BAKI,VOA,Yusif Şərifzadə

Səudiyyə Ərəbistanının milli dəniz daşımaları şirkəti Bahri ölkəyə məxsus Wadiyan xam neft tankerinin Hörmüz boğazından keçərkən insidentlə üzləşdiyini, lakin gəminin heyətinin, yükünün və texniki vəziyyətinin təhlükəsiz olduğunu açıqlayıb.

VOA xəbər verir ki, şirkətin bəyanatı ABŞ Mərkəzi Komandanlığının İran hədəflərinə zərbələr endirdiyini açıqlamasından sonra yayılıb. ABŞ ordusu bu əməliyyatların Wadiyan, Al Rekayyat və Cyprus Prosperity kommersiya gəmilərinə edilən hücumlara cavab olaraq həyata keçirildiyini bildirib.

ABŞ Mərkəzi Komandanlığının məlumatına görə, yüksək dəqiqlikli sursatlardan istifadə edilməklə İranın hava hücumundan müdafiə sistemləri, komanda-idarəetmə şəbəkələri, sahil radarları və gəmi əleyhinə raket imkanları daxil olmaqla 80-dən çox hədəf vurulub. Əməliyyat zamanı, həmçinin Hörmüz boğazında fəaliyyət göstərən İran İnqilab Keşikçiləri Korpusunun Hərbi Dəniz Qüvvələrinə məxsus 60-dan çox sürətli hücum qayığının məhv edildiyi bildirilib.

ABŞ ordusu əməliyyatın məqsədinin İranın beynəlxalq gəmiçiliyə qarşı hücum imkanlarını zəiflətmək olduğunu açıqlayıb.

Bahri şirkəti insidentdən dərhal sonra aidiyyəti qurumları məlumatlandırdığını və Wadiyan tankerinin heyəti ilə daimi əlaqə saxladığını bildirib. Şirkət vurğulayıb ki, heyətin təhlükəsizliyi, dəniz mühitinin qorunması və tankerin təhlükəsiz istismarı əsas prioritet olaraq qalır.

Şirkətin məlumatına görə, hadisə nəticəsində heyət üzvləri arasında xəsarət alan olmayıb. Wadiyan tankeri istismara yararlı vəziyyətdədir və daşıdığı neft yükü tam təhlükəsiz şəkildə qorunub.