BAKI,VOA, Nailə Babazadə

İran Prezidenti Məsud Pezeşkian ABŞ Prezidenti Donald Trampın bəyanatlarına cavab verərək ölkəsində sərt xətt tərəfdarları və ya mülayimlər kimi bir ayrımın olmadığını bildirib.

VOA xəbər verir ki, Pezeşkian sosial media hesabından etdiyi açıqlamada Trampın İran rəhbərliyi daxilində siyasi liderlik çəkişməsi olduğu barədə iddialarını qətiyyətlə təkzib edib. Dövlət başçısı ölkədə hər kəsin iranlı və inqilabçı olduğunu vurğulayaraq milli birliyin sarsılmaz olduğunu qeyd edib.

Prezidentin sözlərinə görə millət və dövlətin dəmir kimi birliyi həmçinin ölkə rəhbərinin təlimatlarına tam bağlılıq sayəsində təcavüzkar cinayətkarlar peşman ediləcək. Pezeşkian tək tanrı tək millət tək lider və tək yolun İranın zəfər yolu olduğunu ifadə edib. Maraqlıdır ki eyni mesajı İranın Parlament sədri Məhəmməd Baqir Qalibaf və Məhkəmə Hakimiyyətinin rəhbəri Qulamhüseyn Möhsüni Ejei də öz sosial media hesablarında paylaşaraq ölkə rəhbərliyinin vahid mövqeyini nümayiş etdiriblər.

Xatırladaq ki ABŞ Prezidenti Donald Tramp sosial mediada paylaşdığı mesajında İranda liderlik müharibəsi yaşandığını iddia etmişdi. Tramp İran rəhbərliyinin kimin başçı olduğunu anlamaqda çətinlik çəkdiyini və döyüş meydanında məğlub olan sərtlik tərəfdarları ilə o qədər də mülayim olmayan qruplar arasında ciddi daxili çəkişmələrin getdiyini öne sürmüşdü. İran tərəfinin bu cavabı Vaşinqtonun psixoloji təzyiq cəhdlərinə qarşı daxili sabitlik nümayişi kimi qiymətləndirilir.