BAKI,VOA

ABŞ ilə aparılan danışıqlarda İran nümayəndə heyətinə rəhbərlik edən İran parlamentinin (Məclis) sədri Məhəmməd Baqir Qalibaf görüşlərin nəticəsiz qaldığını elan edib. Qalibaf vurğulayıb ki, Vaşinqtonun mövqeyi Yaxın Şərqdəki müharibəyə birdəfəlik son qoyacaq bir razılaşmanın əldə olunması üçün kifayət etməyib.

VOA xəbər verir ki,Pakistanın paytaxtında keçirilən və gərgin keçən müzakirələrin başa çatmasından bir neçə saat sonra Qalibaf rəsmi bəyanatla çıxış edib.
"İran nümayəndə heyətindəki həmkarlarım konstruktiv təşəbbüslərlə çıxış etdilər, lakin sonda qarşı tərəf bu danışıqlar raundunda İran heyətinin etimadını qazanmağa nail ola bilmədi."-deyə o bildirib.

Sülh yolunda maneələr
İran tərəfinin bu bəyanatı İslamabad görüşündən gözlənilən böyük sıçrayışın baş vermədiyini və tərəflər arasındakı fikir ayrılıqlarının hələ də dərin olduğunu göstərir. Qalibafın sözlərinə görə, Tehranın təklif etdiyi "konstruktiv təşəbbüslərə" Vaşinqtondan adekvat və inandırıcı cavab gəlməyib. Bu isə Yaxın Şərqdə davam edən genişmiqyaslı müharibənin dayandırılması üçün əldə olunan atəşkəsin nə qədər kövrək olduğunu bir daha sübut edir.

Analitiklər hesab edirlər ki, Qalibafın "etimad qazana bilmədilər" ifadəsi gələcək danışıqlar prosesinin daha sərt şərtlər altında keçəcəyindən və İranın hərbi-siyasi geri çəkilməyə meylli olmadığından xəbər verir.