BAKI,VOA, Orxan Qədirzadə

Yaxın Şərqdə davam edən "Epik Qəzəb" əməliyyatı çərçivəsində ABŞ hərbi hava qüvvələri ard-arda ağır itkilər verir.

VOA xəbər verir ki, İran İnqilabı Keşikçiləri Korpusu (SEPAH) tərəfindən vurulan F-15 qırıcısının ardınca, Hörmüz boğazı yaxınlığında ABŞ-a məxsus ikinci bir döyüş təyyarəsinin vurulduğu bildirilir.

"New York Times"ın yaydığı son dəqiqə məlumatına görə, hava döyüşləri regionda ən gərgin fazasına daxil olub. İkinci qırıcının vurulmasından dərhal sonra pilotun xilas edilməsi üçün əraziyə göndərilən ABŞ-ın axtarış-xilasetmə helikopterinin də İran tərəfindən hədəf alındığı və vurulduğu qeyd olunur. İranın "Mehr" agentliyi vurulan helikopterin görüntülərini paylaşaraq, ABŞ-ın pilotu xilas etmək cəhdlərinin uğursuzluqla nəticələndiyini iddia edib.

Xatırladaq ki, bundan əvvəl İranın mərkəzi hissəsində vurulan təyyarənin qalıqları üzərində "U.S. Air Forces in Europe" yazısı olan emblemlər aşkar edilmişdi. Pentaqonun itirilmiş pilotları tapmaq üçün "Black Hawk" və "C-130" təyyarələri ilə həyata keçirməyə çalışdığı əməliyyatların da İran hava hücumundan müdafiə sistemləri tərəfindən qarşısının alındığı bildirilir. Bu hadisə ABŞ-ın regiondakı hava üstünlüyünə ciddi zərbə kimi qiymətləndirilir.