BAKI,VOA, Fərid Mikayılov
İran Basra körfəzinə çıxışı olan ölkələrin enerji obyektlərinə qarşı yeni raket hücumlarına başladığını açıqlayıb
VOA xəbər verir ki, hücumlar ABŞ və İsrailin İranın enerji infrastrukturuna endirdiyi zərbələrə cavab xarakteri daşıyır.
Bildirilir ki, hücum dalğası region ölkələrinin Riyad şəhərində son vəziyyəti müzakirə etdiyi görüşdən sonra həyata keçirilib. İran tərəfi Basra körfəzi ölkələrində ABŞ ilə əlaqəli enerji obyektlərini hədəf alacağını bəyan edib.
Məlumata görə, daha əvvəl ABŞ və İsrail İranın Əsəluye neft emalı zavoduna və Cənub Pars qaz yatağına zərbələr endirib. Bunun ardınca İran Silahlı Qüvvələri region ölkələrində yerləşən bəzi enerji obyektlərinə qarşı xəbərdarlıq etmiş və təxliyə çağırışı etmişdi.
Səudiyyə Ərəbistanının xarici işlər naziri Faysal bin Fərhan isə açıqlamasında İranın mümkün cavab addımlarına qarşı Körfəz ölkələrinin gücsüz olmadığını bildirib və Tehranın yanlış hesablamalara yol verdiyini vurğulayıb.