BAKI, VOA, Fərid Mikayılov

İranın İsrailə raket zərbələri Tel-Əviv və ətraf bölgələrdə həyəcan siqnallarına səbəb olub.

VOA xəbər verir ki, İran tərəfindən yeni raket hücumunun başladığı barədə məlumat yayıldıqdan sonra İsrailin mərkəzi bölgələrində, xüsusilə Tel-Əvivdə sirenlər səslənib. Məlumata görə, hücum nəticəsində bəzi binalar və nəqliyyat vasitələri zərər görüb, Holon şəhərindəki dəmir yolu stansiyasında maddi ziyan qeydə alınıb.

İsrail ordusu açıqlamasında bildirib ki, İran tərəfindən atılan raketlərin qarşısını almaq üçün hava hücumundan müdafiə sistemləri aktivləşdirilib.

Təhlükə ehtimalı olan ərazilərdə mobil telefonlara xəbərdarlıq mesajları göndərilib və əhalidən sığınacaqlara daxil olmaları tələb olunub.

Hücumlar fonunda Tel-Əvivlə yanaşı, Qüds və İordan çayının qərb sahilində yerləşən yaşayış məntəqələrində də hava həyəcan siqnalları işə düşüb.

İsrail polisi bildirib ki, raket qalıqlarının düşdüyü ərazilərə mütəxəssislər cəlb olunub.

İsrailin təcili yardım xidməti ilkin məlumata görə, hücum nəticəsində ölən və ya yaralananların olmadığını açıqlayıb.