BAKI,VOA, Fərid Mikayılov

ABŞ prezidenti Donald Tramp bildirib ki, Tehran danışıqlar aparmaq istəsə də, hazırda buna hazır görünmür.

VOA xəbər verir ki, Donald Tramp prezident təyyarəsində jurnalistlərin suallarını cavablandırarkən İranla bağlı hərbi və diplomatik vəziyyətə toxunub.

Onun sözlərinə görə, İranın donanması, hava hücumundan müdafiə sistemləri və hava qüvvələri ciddi zərbələr alıb.

Tramp iddia edib ki, ABŞ İranın pilotsuz uçuş aparatları istehsal edən müəssisələrinə zərbələr endirib. O qeyd edib ki, Tehran danışıqlar aparmaq niyyətində olsa da, Vaşinqton hesab edir ki, İran hələ bu mərhələyə hazır deyil.

ABŞ prezidenti həmçinin Hörmüz boğazının açıq qalmasının vacibliyini vurğulayıb. Tramp bildirib ki, bu strateji su yolunun təhlükəsizliyi məsələsi üzrə bir sıra ölkələrlə məsləhətləşmələr aparılır və artıq yeddi ölkə ilə danışıqlar davam edir.

Eyni zamanda, Tramp İngiltərənin Financial Times nəşrinə verdiyi müsahibədə Çin də daxil olmaqla digər dövlətlərin Hörmüz boğazının açıq saxlanmasına töhfə verməli olduğunu qeyd edib.

ABŞ prezidenti əlavə edib ki, ayın sonunda Çin lideri Si Cinpin ilə keçirilməsi planlaşdırılan sammit də regional gərginlik səbəbindən təxirə salına bilər.