BAKI, AzerVoice
27 noyabr 2015-ci ildə xristian dünyasında gözlənilməz bir hadisə baş verdi: sadəliyi, humanizmi və cəmiyyətin ən həssas təbəqələrinə diqqəti ilə tanınan Papa Fransisk “Wake Up! Music Album with His Words and Prayers” adlı musiqi albomunu təqdim etdi. Albomda pontifikin çıxışları proqressiv rok, kilsə musiqisi və dini ilahilərlə birləşdirilib.
Vatikanda rəsmi şəkildə təsdiqlənən layihə Believe Digital tərəfindən hazırlanıb və 11 trekdən ibarətdir. Musiqi tərzi italyan proq-rokundan tutmuş qriqorian nəğmələrinə qədər uzanır və Fransiskin insan ləyaqəti, sülh, ümid, ekologiya və mərhəmət barədə nitqləri ilə müşayiət olunur.
Albomun adını daşıyan “Wake Up! Go! Go! Forward!” treki 2014-cü ildə Cənubi Koreyada keçirilən Asiya Gənclər Gününün bağlanış ayinindən götürülüb. Pontifik burada gənclərə müraciət edərək deyirdi: “Asiyanın gəncləri, oyanın!”
Layihənin prodüseri Don Culio Neroni The Catholic Register-ə açıqlamasında bildirib ki, məqsədi Papa Fransiskin “dialoqu, açıq qapıları və qonaqpərvərliyi təbliğ edən pastoral şəxsiyyətini əks etdirmək” olub.
Albom təqdim olunduqdan qısa müddət sonra Billboard-un World Albums siyahısında 4-cü, Top Christian Albums siyahısında isə 5-ci yeri tutub və dua ilə rok musiqisinin sintezini uğurla birləşdirdiyinə görə müsbət rəylər alıb.
Qeyd edək ki, Papa Fransisk musiqi albomu buraxan ilk pontifik deyil — ondan əvvəl Papa XXIII İoann, II İoann Pavel və XVI Benedikt də müxtəlif musiqi layihələri ilə çartlarda yer almışdı.
Papa Fransisk 21 aprel 2025-ci ildə vəfat edib.