BAKI, VOA, Orxan Qədirzadə
Cənubi Afrika və ABŞ-ın 2013-cü il birgə istehsalı olan "Mandela: Azadlığa gedən uzun yol" (Mandela: Long Walk to Freedom) dram və avtobioqrafiya filmi, dünya tarixinin ən nüfuzlu liderlərindən birinin ömür yoluna işıq salıb.
Rejissor Castin Çadvikin ekranlaşdırdığı bu ekran əsəri, Cənubi Afrikanın ilk qaradərili prezidenti və anti-aparteid hərəkatının rəmzi olan Nelson Mandelanın uşaqlığından hakimiyyətə gəlişinə qədər olan dövrü əhatə edib.
Ssenarisi Uilyam Nikolson tərəfindən Mandelanın eyniadlı avtobioqrafiyası əsasında hazırlanan filmdə baş rolu tanınmış aktyor İdris Elba canlandırıb. Ekran işində həmçinin Naomie Harris, Robert Hobbs və Mark Elderk kimi ulduzlar yer alıb.
Filmin ilk nümayişi Cənubi Afrikada reallaşıb və ekran əsərini Ağ Evdə izləyən ilk şəxslərdən biri ABŞ-ın o zamankı prezidenti Barak Obama olub.
Musiqi və mükafatlar:
Ekran əsəri nümayiş olunduğu gündən etibarən müxtəlif beynəlxalq mükafatlara namizəd göstərilib.
Filmin ən böyük uğurlarından biri dünyaca məşhur U2 qrupunun bəstələdiyi "Ordinary Love" mahnısı ilə bağlı olub. Bu bəstə "Qızıl Qlobus" mükafatlarında "Ən yaxşı orijinal mahnı" nominasiyasının qalibi seçilib.
Həmçinin film 86-cı Akademiya (Oskar) mükafatlarında da eyni nominasiya üzrə namizəd olub.
Filmin istehsalı "Pathé" və "The Weinstein Company" tərəfindən həyata keçirilib. Çəkiliş heyətində operator Lol Krouli və bəstəkar Aleks Heffes kimi peşəkarlar yer alıb. Baş rolda çıxış edən İdris Elba həm "Qızıl Qlobus", həm də ABFF Hollywood mükafatlarında "İlin ən yaxşı aktyoru" nominasiyasına layiq görülüb.