BAKI, AzerVoice

Cəzair Cinayət Məhkəməsi, Əlcəzairdə qadağan olunmuş “İslami Xilas Cəbhəsi” partiyasının liderlərinə üç il və ömürlük arasında dəyişən müddətlərdə həbs qərarı verib. Onlar 2023-cü ildə internetdə ölkədəki siyasi və iqtisadi vəziyyətlə bağlı bəyanat dərc etdiklərinə görə həbs olunmuşdular.

AzerVoice xəbər verir ki, bu barədə xarici KİV məlumat yayıb.

Məlumata əsasən, 18 nəfərlik “İslami Xilas Cəbhəsi” qrupunun məhkəməsi 10 saat davam etdi. Məhkəmənin əvvəlində bəraət ümidi olsa da, prokuror 16 nəfər üçün 12 il, iki qaçqın üçün isə ömürlük həbs cəzası tələb etdikdən sonra bu ümidlər puç oldu.

Məhkəmə “terror təşkilatı yaratmaq” maddəsini ləğv etsə də, “ölkə birliyinə xələl yetirmək” və “milli faciənin yaralarını siyasi məqsədlərlə istismar etmək” kimi ittihamlar saxlanıldı. Bu ittihamlar 1990-cı illərdəki terror aktlarını siyasi məqsədlərlə istifadə etməyi qadağan edən 2006-cı il “Sülh Qanunu”na əsaslanır.

Azadlıqdan məhrum edilənlər arasında təşkilatın keçmiş lideri Əli bin Həccər də var. O, 1990-cı illərdə “Dəvət və Cihad Qrupu”nu qurmuş və 1997-ci ildə onu ləğv etmişdi. Məhkəmə onu və daha beş nəfəri dörd il, digər 9 nəfəri isə üç il həbs cəzasına məhkum etdi. İslamçı fəal Bəlqasım Xənşə iki il, qaçqın vəziyyətdə olan İbrahim Qərbi və Ləxdar Əzizi isə qiyabi olaraq ömürlük həbs cəzası alıblar.