Bakı. AzerVoice :
Oman Azərbaycanın məhsul və xidmət ekosistemlərinin inkişafında iştirak imkanını nəzərdən keçirir.
AzerVoice "StrategEast" şirkətinin məlumatlarına istinadən xəbər verir ki, bu barədə şirkətin prezidenti Anatoli Motkin "Comex 2024" forumunda deyib.
"Oman yüksək keyfiyyətli rəqəmsal xidmətlər almaqda maraqlıdır və Mərkəzi Asiya ölkələrinin, xüsusən Azərbaycanın məhsul və xidmət ekosistemlərinin inkişafında iştirak imkanını nəzərdən keçirir. Oman Qafqaz ölkələrinin İT sahəsində səriştə artırma səviyyəsinə verə biləcəyi töhfəni anlayır və yüksək qiymətləndirir. İnanıram ki, bu, Fars körfəzi və Mərkəzi Asiya regionları arasında İT sahəsində uzun və səmərəli əməkdaşlığın başlanğıcıdır", - "StrategEast" şirkətinin prezidenti deyib.
Bundan başqa, qeyd olunub ki, Azərbaycandan olan iştirakçılar Azərbaycan və Oman arasında texnoloji tərəfdaşlığın çoxvədli olduğunu vurğulayıb.
"Birgə fəaliyyət bizə iqtisadiyyatı inkişaf etdirməyimizə, ticarəti yaxşılaşdırmağa, eləcə də investisiyalar və texnoloji startapların genişləndirilməsi üçün yeni imkanlar yaratmağa imkan verəcək. Bu, həm ölkələrə, həm də bütün regiona fayda verəcək", - deyə Azərbaycandan olan iştirakçılar "Comex 2024" forumunda iştirakla bağlı fikir bildiriblər.
Xatırladaq ki, "StrategEast" beynəlxalq maliyyə institutları, inkişaf agentlikləri, qlobal texnologiya şirkətləri və Avrasiya ölkələrinin hökumətlərinin əməkdaşlığı ilə Avrasiyanın rəqəmsal iqtisadiyyatının inkişafı üzərində çalışan aparıcı müstəqil təşkilatdır.
"StrategEast" ABŞ, Ukrayna, Gürcüstan, Qırğızıstan və Qazaxıstanda ofisləri olan qeyri-kommersiya təşkilatıdır.
