Bakı, AzerVoice
Bu gün COP29 çərçivəsində iqlim dayanıqlığının təmin olunması üçün Bakı prinsipləri təsdiq edildi.
AzerVoice xəbər verir ki, bu barədə COP29 fəaliyyət gündəliyinin qlobal təşəbbüslər qrupunun həmsədri Elmar Məmmədov "Bacarıqlara sərmayə — iqlim sahəsində əhəmiyyətli öhdəlik" mövzusunda keçirilən panel müzakirədə bildirib.
"Bu gün İnsan Potensialının İnkişafı Günü çərçivəsində tədbirlərin əsasını təşkil edəcək iki əsas təşəbbüsü təqdim etdik. Bu təşəbbüslər UNESCO, ÜST, BƏT və digər BMT agentlikləri, eləcə də üç çoxtərəfli inkişaf bankı — Asiya İnkişaf Bankı, İslam İnkişaf Bankı və üç fond — Qlobal Fond, Yaşıl İqlim Fondu və Adaptasiya Fondu tərəfindən dəstəklənir. Bununla yanaşı, iqlim dəyişikliklərinə dayanıqlılığı gücləndirmək üçün İnsan Potensialının İnkişafı üzrə Bakı Təşəbbüsü ilə bağlı birgə bəyanat qəbul etdik. Eyni zamanda, iqlim dayanıqlığının təmin olunması üçün Bakı İnsan Potensialının İnkişafı üzrə rəhbər prinsipləri təsdiq edildi", — deyə E.Məmmədov vurğulayıb.
Onun sözlərinə görə, təşəbbüslərin və fəaliyyət planının hazırlanması prosesində hərtərəfli məsləhətləşmələr aparılıb.
"Bu prosesi mümkün qədər inklüziv və şəffaf etmək məqsədini güdmüşük. Bu məsləhətləşmələr çərçivəsində biz yalnız iştirakçılarla deyil, vətəndaş cəmiyyətinin nümayəndələri, analitik mərkəzlər, çoxtərəfli inkişaf bankları, beynəlxalq təşkilatlar və digər əsas iştirakçılarla da əməkdaşlıq etdik", — deyə o əlavə edib.
Qeyd edək ki, noyabrın 11-də BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) açılışı olub.
COP29 çərçivəsində ən yüksək səviyyəli tədbir – Dünya Liderlərinin İqlim Fəaliyyəti Sammiti noyabrın 12-13-də təşkil olunub.
Noyabrın 22-dək Bakı Stadionunda keçiriləcək COP29 Azərbaycanın bu günədək təşkil etdiyi ən nəhəng tədbirdir və regionda ilk dəfə Azərbaycanda baş tutur.
COP29-dan əsas gözlənti iqlim maliyyəsi ilə bağlı ədalətli və ambisiyalı Yeni Kollektiv Kəmiyyət Hədəfinin (NCQG) razılaşdırılmasından ibarətdir.
COP29 Sədrliyi tərəfindən iqlim fəaliyyəti ilə dayanıqlı inkişaf məqsədləri arasında əlaqəni ehtiva edən, yaşıl enerji dəhlizləri, yaşıl enerji saxlancları, iqlim dayanıqlılığı üçün harmoniya, təmiz hidrogen, orqanik tullantılarda metanın azaldılması, yaşıl rəqəmsal fəaliyyət və digər mövzuları əhatə edən 14 təşəbbüs irəli sürülüb.
İqlim maliyyəsinin yaradılması fəaliyyət üçün şərait yaradan əsas prioritet olmaqla yanaşı, hamını bir araya gətirməklə 1,5°C öhdəliyinin yerinə yetirilməsinə töhfə verəcək.