Səudiyyə Pro Liqasının 30-cu turu çərçivəsində baş tutan qarşılaşmada “Əl-Feyha” səfərdə “Əl-Xolud”un qonağı olub. Görüşün 30-cu dəqiqəsində Kris Smollinqin vurduğu qolla önə keçən “Əl-Feyha” üstünlüyünü qoruya bilməyib və meydan sahiblərinin 39-cu dəqiqədə İker Kortaxarenanın qolu ilə cavab verməsi nəticəsində matç 1:1 hesablı bərabərliklə yekunlaşıb.
ArabAZ xəbər verir ki, bu nəticədən sonra xallarının sayını 30-a çatdıran “Əl-Xolud” turnir cədvəlinin 14-cü pilləsində qərarlaşıb. Mövsümün sonuna dörd tur qalmış komanda təhlükəli zonadan cəmi 7 xal uzaqlıqdadır. Digər tərəfdən, “Əl-Feyha” 35 xalla 10-cu yerdəki mövqeyini qoruyur. Hər iki komanda üçün bu bərabərlik turnir cədvəlindəki mövqelərini möhkəmləndirmək baxımından kifayət qədər “məyusedici” nəticə kimi qiymətləndirilir.