Bəzi mahnılar sadəcə sevgidən bəhs etmir, onlar həm də yıxılan insanı ayağa qaldırır, sabaha olan ümidi yenidən alovlandırır. Müasir ərəb musiqisinin ən səmimi simalarından biri olan Hamza Nəmirənin ifa etdiyi, musiqi tərtibatında isə dünyaşöhrətli soydaşımız Sami Yusufun imzasını daşıyan “Ehlam Ma’aya” (Mənimlə xəyal et) məhz belə bir əsərdir.

Sözləri Sameh Xeyriyə , bəstəsi isə Farhata aid olan bu mahnı, çətinliklər qarşısında təslim olmayan, buludları yarıb keçməyə hazır olan insanların manifestidir. Etdiyimiz hər səhvin, atdığımız hər addımın bizi xəyallarımıza yaxınlaşdırdığını deyən bu nəğməni ArabAZ oxucularına xüsusi motivasiya ilə təqdim edirik.

Ehlam ma’aya (Mənimlə xəyal et)

Mənimlə birlikdə gələcək sabahı xəyal et,
Əgər o sabah gəlməsə belə, onu özümüz gətirərik!
Yola çıxıb yenidən cəhd etməyə başlayaq,
Atdığımız addımların çoxluğu bizi xəyallarımıza aparacaq.

Nə qədər yıxılsaq da, yenidən ayağa qalxa bilərik,
Çətinlikləri yarıb, buludlara meydan oxuyarıq.
Gecəmizi min bərəkətli günə çevirərik,
Yetər ki, biz xəyal edək…

Mənimlə birlikdə xəyal et, ey dostum!
Addımların bu yolun torpağını büküb keçsin (yolu qısaltsın).
Mənim üçün o günahsız, saf xəyal çox önəmlidir, hər nə olursa olsun…
Qoy o xəyal öz ruhu ilə hər zaman yanımızda qalsın.

Yolumuz nə qədər uzanırsa uzansın,
Hətta azsaq belə, ey dostum,
Yenidən görüşümüz bizi bağrına basacaq,
Xəyallarımızın daxilində, öz xəyalımızda…
Yetər ki, biz xəyal edək…