BAKI,VOA,Yusif Şərifzadə

Çinin avtomobil istehsalçısı "Çeri" Cənubi Afrikanın Roslin şəhərində yerləşən keçmiş "Nissan" avtomobil zavodunu rəsmi şəkildə təhvil alıb. Şirkət 2027-ci ilin ortalarından etibarən burada avtomobil istehsalına başlamağı planlaşdırır.

VOA xəbər verir ki, "Çeri" şirkəti zavodun modernləşdirilməsi və yeni avadanlıqlarla təchiz olunması üçün milyonlarla ABŞ dolları həcmində sərmayə yatıracağını açıqlayıb.

Şirkətin məlumatına görə, məqsəd Cənubi Afrikanı istehsal, ixrac, elmi tədqiqat, məhsulun hazırlanması və regional fəaliyyət üzrə Afrika qitəsində əsas mərkəzə çevirməkdir.

"Çeri" hazırda zavodda çalışan 692 əməkdaşın hamısını işdə saxlayacağını və layihənin istehsal, təchizat zənciri və əlaqəli xidmət sahələrində təxminən 3 min birbaşa və dolayı iş yeri yaradacağını bildirib.

Şirkətin vitse-prezidenti Çarli Canqın sözlərinə görə, uzunmüddətli məqsəd Roslin zavodunu elmi tədqiqat, təchizat zənciri və kadr hazırlığını özündə birləşdirən tam avtomobil istehsalı mərkəzinə çevirməkdir. O bildirib ki, şirkət gələcəkdə Cənubi Afrikada illik 100 mindən çox avtomobil satmağı hədəfləyir.

İlkin mərhələdə zavodda "Jetour T" seriyası, "Jaecoo J5" və "Chery Tiggo 4" yolsuzluq avtomobilləri istehsal olunacaq. "Jaecoo J5" həm daxili yanma mühərrikli, həm də elektrik mühərrikli versiyalarda buraxılacaq.

Şirkət istehsalın genişləndirilməsi mərhələsində – 2027-ci ilin üçüncü və dördüncü rüblərində təxminən 15 min avtomobil istehsal etməyi planlaşdırır. Bununla yanaşı, yerli istehsal komponentlərinin payının ilkin mərhələdə 40 faizə çatdırılması və Çinli təchizatçıların da layihəyə cəlb edilməsi nəzərdə tutulur.