Bakı,AzerVoice
ABŞ prezidenti Co Baydenin Qəzza zolağının Rəfah şəhərinə qarşı genişmiqyaslı quru əməliyyatı başlayacağı təqdirdə silah tədarükünü dayandıracağı ilə bağlı açıqlaması İsraildə təşviş yaradıb.
Amerikanın “Wall Street Journal” (WSJ) qəzeti silah tədarükünün dayandırılması ilə bağlı bəyanatın “İsrail-ABŞ münasibətlərində indiyə qədərki ən pis böhranlardan birinə səbəb ola biləcəyini” yazıb. Xatırladaq ki, ABŞ sonuncu dəfə belə təcrübəni 1982-ci ildə, keçmiş prezident Ronald Reyqanın hakimiyyəti dövründə həyata keçirib.
WSJ-nin məlumatına görə, İsrail və ABŞ kəşfiyyat rəsmiləri Rəfəhdə hərtərəfli quru əməliyyatı aparılsa belə, Qəzzada HƏMAS-ı tamamilə məhv etməyin mümkün olmadığını iddia edirlər.
ABŞ-ın aparıcı media qurumlarından biri olan CNN , Baydenin İsrailə silah tədarükünü məhdudlaşdırmaq üçün həm ictimaiyyət, həm də Demokratlar Partiyası tərəfindən böyük təzyiq altında olduğunu yazıb. Təhlildə ABŞ-ın dəstəyi olmadan Qəzza müharibəsində İsrailin əlinin zəifləyəcəyi iddia edilib.
Digər tərəfdən, İsrail Müdafiə Qüvvələrinin (IDF) sözçüsü Daniel Hagari dünən verdiyi açıqlamada Rəfaha qarşı hərtərəfli quru əməliyyatı üçün kifayət qədər silah və sursata sahib olduqlarını iddia etmişdi.
Bayden çərşənbə günü CNN-ə verdiyi açıqlamada silah tədarükünü dayandıracağını bildirib. Bunun ardınca İsrailin baş naziri Benyamin Netanyahu Baydenə reaksiya verərək, "Təkbaşına vuruşmalı olsaq, bunu edəcəyik. Lazım gələrsə, dırnaqlarımızla vuruşacağıq" deyib.
İsrailin müdafiə naziri Yoav Gallant da “Həm dostlarımıza, həm də düşmənlərimizə deyirəm: Siz İsrail dövlətini tabe edə bilməzsiniz”- deyib.
Amerikanın “New York Times” (NYT) qəzeti yazıb ki, Təl-Əviv administrasiyasının açıqlamaları “ABŞ ilə İsrail arasında fikir ayrılıqlarının dərinləşdiyini göstərir”.
