BAKI, AzerVoice
Birləşmiş Millətlər Təşkilatının Təhsil, Elm və Mədəniyyət üzrə Agentliyi (UNESCO) 80 illik tarixində ilk dəfə olaraq bir misirli və ərəb şəxsə rəhbərliyi həvalə edib. Misirin keçmiş turizm və qədim abidələr naziri Xalid əl-Ənani, 2025–2029-cu illəri əhatə edən dörd illik müddət üçün UNESCO-nun baş direktoru seçilib.
Əl-Ənani, UNESCO-nun 1945-ci ildə yaradılmasından bəri quruma rəhbərlik edən ilk ərəb oldu. O, 57 üzvdən 55-nin dəstəyini qazanaraq, təşkilat tarixində ən yüksək səs fərqi ilə seçilən namizəd kimi tarixə düşdü. Bu seçim, Misirin mədəniyyət, təhsil və elm sahələrində beynəlxalq platformalarda daha fəal rol oynamaq istəyinin göstəricisi kimi dəyərləndirilir.
1971-ci il martın 14-də Qahirədə anadan olan Xalid əl-Ənani, Helvan Universitetinin Turizm və Otelçilik fakültəsini bitirib. Daha sonra Fransanın Montpellier Paul Valéry Universitetində Misirşünaslıq (Egyptology) ixtisası üzrə magistratura və doktorantura təhsili alıb.
El-Ənani 30 ildən artıq elmi və inzibati fəaliyyətlə məşğul olub, Helvan Universitetində müxtəlif vəzifələr tutub və Avropanın aparıcı universitetlərində qonaq professor kimi dərs deyib.
2016-cı ildə Qədim Abidələr naziri, 2019-cu ildə isə bu nazirliyin Turizm Nazirliyi ilə birləşdirilməsindən sonra iki vəzifəni bir arada icra edən ilk şəxs olub.
Nazirliyi dövründə o, Misir mədəni irsinin beynəlxalq səviyyədə tanıdılması üçün mühüm layihələr həyata keçirib. Onların arasında? Böyük Misir Muzeyinin inkişafı,Misir Sivilizasiyası Milli Muzeyinin açılışı və dünya miqyasında səs gətirən “Krallar və Kraliçalar Mumya Keçidi” tədbiri xüsusi yer tutur.
Əl-Ənani bildirib ki, UNESCO-da məqsədi akademik biliklə praktiki təcrübəni birləşdirən yeni bir vizyon qurmaq, inkişaf etməkdə olan ölkələri dəstəkləmək, mədəni dialoqu gücləndirmək və təşkilatın qlobal təsirini artırmaqdır.
Əl-Ənaninin karyerası tənqidsiz də olmayıb. 2020-ci ildə Qahirənin tarixi məzarlıq bölgəsində aparılan urbanizasiya layihələri, UNESCO-nun Dünya İrsi Siyahısında yer alan ərazilərə zərər vurduğu iddiaları ilə böyük mübahisə doğurmuşdu.
Məzarların köçürülməsi və bir sıra ailələrin yerindən çıxarılması ictimai narazılıq yaratmışdı. Lakin Əl-Ənaninin rəhbərlik etdiyi Qədim Abidələr Nazirliyi iddiaları rədd edərək, işlərin yalnız müasir dövrə aid məzarlarla bağlı olduğunu və heç bir tarixi abidəyə zərər dəymədiyini açıqlamışdı.