BAKI, AzerVoice Analitik Təhlil Mərkəzi
İsraili tərk edən və geri dönməyi planlaşdırmayan vətəndaşların sayı ölkəyə qayıdan israillilərin sayını üstələyib. Bu barədə İsrail parlamentinin (Knesset) Araşdırma və İnformasiya Mərkəzinin xüsusi hesabatında bildirilib.Hesabata əsasən, ölkədən çıxan israillilərin sayı 2020-ci ildən bəri ardıcıl şəkildə artır. 2020-ci ildə 34 min, 2021-ci ildə 43,4 min, 2022-ci ildə 59,4 min, 2023-cü ildə isə 82,8 min nəfər İsraildən uzunmüddətli olaraq köçüb. Bu, əvvəlki illərlə müqayisədə 39–44 faiz artım deməkdir.
Məlumata görə, xüsusilə 2023-cü ilin oktyabrında, müharibənin başlamasından sonra ölkəni tərk edənlərin sayında ciddi artım qeydə alınıb. Tendensiya 2024-cü ildə də davam edir - ilin ilk səkkiz ayında təxminən 50 min israilli ölkəni tərk edib.
Eyni dövrdə yalnız 12,100 nəfər İsrailə geri dönüb. 2022-ci ildə bu rəqəm 29,600, 2023-cü ildə isə 24,200 nəfər olub.
Ən çox köç verən şəhərlər
Miqrasiya göstəricilərinə görə, Tel-Əviv 2024-cü ildə ölkəni tərk edənlərin ən çox olduğu şəhərdir — şəhər əhalisinin 14%-i miqrasiya edib. Ardınca Hayfa (7,7%), Netanya (6,9%) və Qüds (6,3%) gəlir.
Eyni dövrdə İsraili tərk edənlər arasında kişilərin sayı qadınlardan çox olub — 42,605 kişi və 40,160 qadın.
Yaş qruplarına görə:
30–49 yaş: 28,915 nəfər
0–19 yaş: 22,183 nəfər
20–29 yaş: 16,095 nəfər
50 və yuxarı yaş: 15,581 nəfər
Knessetdə Miqrasiya və Absorbsiya Komitəsinin sədri, Leyboristlər Partiyasının deputatı Gilad Kariv vəziyyəti belə şərh edib: “Bu, artıq sadəcə bir miqrasiya dalğası deyil - İsraildən getməyi seçənlərin sunamisidir. Çox sayda israilli gələcəyini xaricdə qurur, geri dönənlərin sayı isə azalır.”
Kariv bildirib ki, bu vəziyyət taleyin deyil, hökumətin yanlış siyasətinin nəticəsidir.
“Hökumətin prioritetləri tamamilə fərqlidir. O, İsrail cəmiyyətini parçalayır və sivil sahəni diqqətdən kənarda qoyur. Bu, sionist dəyərlərin və İsrailin gələcəyinin tapdanması deməkdir.”-deyə o bildirib.
İsrailin Mərkəzi Statistika Bürosunun məlumatına görə, son yəhudi yeni ili Roş Ha-Şana ilə indiki dövr arasında 79 min israilli ölkəni tərk edib. Yedioth Ahronoth qəzeti yazır ki, İsrail hazırda mənfi miqrasiya balansı yaşayır və hökumətin bu təhlükəli tendensiyanın qarşısını almaq üçün heç bir planı yoxdur.