BAKI,VOA, Orxan Qədirzadə

Türkiyədə məktəblərdə təhlükəsizlik tədbirləri genişləndirilərək həm fiziki, həm də rəqəmsal müstəvini əhatə edən yeni model tətbiq ediləcək.

AzerVoice xəbər verir ki, Türkiyənin milli təhsil naziri Yusuf Tekin keçirdiyi mətbuat konfransında məktəblərdə təhlükəsizliklə bağlı yeni qərarları açıqlayıb.

Nazir bildirib ki, son hadisələr fonunda təhlükəsizlik yanaşması yenilənərək yalnız məktəb əraziləri ilə məhdudlaşmayacaq, eyni zamanda rəqəmsal mühitdə yaranan risklər də nəzarətə götürüləcək.

Açıqlamaya görə, yeni model çərçivəsində süni intellekt dəstəkli nəzarət sistemləri vasitəsilə sosial şəbəkələr və rəqəmsal platformalarda uşaqlara yönələn təhlükələr izlənəcək və erkən müdaxilə mexanizmləri işə salınacaq.

Nazir həmçinin vurğulayıb ki, dövlət qurumları arasında koordinasiya gücləndiriləcək, məktəb ətrafı təhlükəsizlik, giriş-çıxış nəzarəti və risklərin operativ müəyyənləşdirilməsi üçün inteqrasiya olunmuş sistem yaradılacaq.

Qərarlara əsasən, valideynlərlə məktəblər arasında əlaqə daha da genişləndiriləcək, “Valideyn görüş sistemi” daha aktiv işlək vəziyyətə gətiriləcək və ailə-məktəb əməkdaşlığı gücləndiriləcək.

Bundan əlavə, rəqəmsal asılılıq və psixoloji risklərlə bağlı valideynlər üçün xüsusi dəstək və məsləhət xəttinin yaradılması planlaşdırılır.

Məktəblərdə çalışan müəllim və rəhbər heyət üçün isə böhran idarəetməsi, risklərin erkən aşkarlanması və təhlükəli situasiyalara müdaxilə ilə bağlı təlimlər davam etdiriləcək.

Eyni zamanda, şagirdlər üçün psixososial dəstək mexanizmləri genişləndiriləcək və pilot layihə kimi tətbiq olunan “Dəyər əsaslı rəqəmsal rifah proqramı” bütün ölkə üzrə yayılacaq.

Nazir qeyd edib ki, bütün bu tədbirlər məktəblərdə təhlükəsiz mühitin təmin olunması və şagirdlərin sağlam inkişafının qorunması məqsədi daşıyır.