BAKI, AzerVoice, Orxan Qədirzadə
Türkiyə Prezidenti Rəcəb Tayyib Ərdoğan Sudanın Suveren Şurasının sədri Abdel Fəttah əl-Burhan ilə Ankarada Prezident Sarayında görüş keçirib.
AzerVoice xəbər verir ki, Türkiyə Prezident Administrasiyasının Kommunikasiyalar İdarəsinin yaydığı məlumata görə, görüş zamanı Türkiyə ilə Sudan arasında ikitərəfli münasibətlər, eləcə də regional və qlobal proseslər müzakirə olunub.
Prezident Ərdoğan bildirib ki, Türkiyə ilə Sudan arasında əməkdaşlıq ticarət, kənd təsərrüfatı, müdafiə sənayesi və dağ-mədən sektoru da daxil olmaqla müxtəlif sahələr üzrə inkişaf etdiriləcək.
Görüşdə Sudanda davam edən münaqişənin dünyanın ən böyük humanitar böhranlarından birinə çevrildiyi qeyd olunub. Prezident Ərdoğan xüsusilə Əl-Faşir bölgəsində baş verən və insanlığa qarşı cinayətlərə bərabər tutulan hadisələrə diqqət çəkərək, bu cür halların qarşısının alınması üçün ciddi və qətiyyətli addımların atılmasının vacibliyini vurğulayıb.
Türkiyə Prezidenti bəyan edib ki, Ankara Sudanın sülhünün, sabitliyinin və ərazi bütövlüyünün qorunmasını dəstəkləyir. Onun sözlərinə görə, Türkiyənin əsas məqsədi atəşkəsin əldə olunması və Sudan xalqları arasında davamlı sülhün təmin edilməsidir.
Ərdoğan əlavə edib ki, Türkiyə humanitar yardım vasitəsilə ağır humanitar vəziyyətlə üzləşən Sudan xalqının ehtiyaclarının qarşılanmasına dəstəyini davam etdirəcək.
Sudan Suveren Şurasının sədri Abdel Fəttah əl-Burhanın rəsmi səfəri çərçivəsində Prezident Ərdoğanla təkbətək görüşdən sonra işgüzar nahar da təşkil olunub.
Mətbuata qapalı keçirilən işgüzar naharda Türkiyənin xarici işlər naziri Hakan Fidan, milli müdafiə naziri Yaşar Güler, kənd təsərrüfatı və meşəçilik naziri İbrahim Yumaklı, Milli Kəşfiyyat Təşkilatının rəhbəri İbrahim Kalın, Prezident Administrasiyasının rəhbəri Hasan Doğan, Kommunikasiyalar İdarəsinin rəhbəri Burhanəddin Duran, Müdafiə Sənayesi İdarəsinin rəhbəri Haluk Görgün və Prezidentin xarici siyasət və təhlükəsizlik məsələləri üzrə baş müşaviri Akif Çağatay Kılıç iştirak ediblər.