BAKI, AzerVoice, Nailə Babazadə

Naxçıvan Sazişi və “Türk Dünyası Vizyonu – 2040” dövlətləri ortaq məqsədlər ətrafında birləşdirir və bu çərçivədə hüquqi əməkdaşlığın dərinləşdirilməsi xüsusi əhəmiyyət daşıyır.

AzerVoice xəbər verir ki, bu sözləri Türkiyənin ədliyyə naziri Yılmaz Tunc, Bakıda keçirilən Türk Dövlətləri Təşkilatının (TDT) Ədliyyə Nazirləri 2-ci Toplantısında çıxış edərək, hüquq və ədliyyə sahəsində əməkdaşlığın daha da möhkəmləndirilməsinin önəmini vurğulayıb.

Nazir qeyd edib ki, toplantının əsas mövzusu hüquq və ədliyyə sahəsində rəqəmsal transformasiyadır və rəqəmsal texnologiyalar artıq təkcə texniki məsələ deyil, həyatın bütün sahələrini dəyişdirən bir prosesə çevrilib.

Tunc Türkiyədə ədliyyə sistemindəki rəqəmsal layihələr barədə məlumat verib: UYAP, SEGBİS, E-Məhkəmə (E-Duruşma), cəzaçəkmə müəssisələrinə inteqrasiya olunan ağıllı texnologiyalar (ACEP) və elektron tebligat sistemləri kimi layihələrin ədliyyə xidmətlərini daha əlçatan etdiyini vurğulayıb.

O, hüquq sahəsində süni intellektdən istifadənin də gündəmdə olduğunu və Türkiyədə böyük data analizi, iş yükü xəritələri və məhkəmə proseslərinin optimallaşdırılmasına dair proqramların hazırlanıldığını bildirib.

Nazir əlavə edib ki, xüsusilə işlərin təsnifatı, oxşar presedentlərin tapılması və qərar layihələrinin hazırlanması kimi sahələrdə süni intellekt əsaslı sistemlər inkişaf etdirilir və bütün bu proseslərdə güclü kibertəhlükəsizlik infrastrukturunun qurulmasına xüsusi önəm verilir.