BAKI,VOA, Fərid Mikayılov

Türkiyənin ədliyyə naziri Akın Gürlek Azərbaycanın cinayətkarların ekstradisiyası məsələsində Türkiyəyə hər cür dəstəyi göstərdiyini bildirib.

VOA xəbər verir ki, rəsmi səfər çərçivəsində Azərbaycanda olan nazir əvvəlcə ümummilli lider Heydər Əliyevin məzarını ziyarət edərək Fəxri xiyabanda əklil qoyub.

Daha sonra o, Bakıda Şəhidlər xiyabanında 20 Yanvar şəhidlərinin xatirəsini yad edib, həmçinin Bakı Türk Şəhidliyi abidəsini ziyarət edərək əklil təqdim edib.

Səfərdən sonra jurnalistlərə açıqlama verən Akın Gürlek bildirib ki, vəzifəyə təyin olunduqdan sonra ilk rəsmi xarici səfərini dost və qardaş Azərbaycana edib.

Nazir qeyd edib ki, səfər çərçivəsində Azərbaycanın ədliyyə naziri, baş prokuroru və Dövlət Təhlükəsizliyi Xidmətinin rəhbərliyi ilə görüşlər keçirəcək, həmçinin Prezident İlham Əliyev tərəfindən qəbul olunacaq.

Akın Gürlek vurğulayıb ki, Azərbaycan ilə hüquqi sahədə əməkdaşlıq yüksək səviyyədədir və bu əlaqələrin daha da genişləndirilməsi məqsədilə müzakirələr aparılacaq.

Türkiyədən xaricə qaçan cinayətkarların ekstradisiyası məsələsinə toxunan nazir bildirib ki, Ankara dünyanın harasında olmalarından asılı olmayaraq həmin şəxslərin Türkiyəyə qaytarılması istiqamətində qətiyyətli mövqe nümayiş etdirir.

Onun sözlərinə görə, ekstradisiya tələbləri mütəmadi yenilənir, yeni sübut və sənədlər əldə olunduqca aidiyyəti ölkələrə təqdim edilir.

"Azərbaycan dövləti bu məsələdə bizə hər cür dəstəyi göstərir", – deyə Akın Gürlek bildirib.

Nazir əlavə edib ki, Türkiyədə cinayət törədərək xaricə qaçan şəxslərlə bağlı proses sonadək izlənilir və ikitərəfli hüquqi əməkdaşlıq çərçivəsində onların Türkiyəyə təhvil verilməsi istiqamətində işlər davam etdirilir.