BAKI, AzerVoice, Səməd Əyyubov
Türkiyənin Balıkesir vilayətinin Ayvalık rayonu sahillərində qeyri-qanuni miqrantları daşıyan qayığın Sahil Təhlükəsizlik xidmətinə məxsus katerlə toqquşması nəticəsində 5 nəfər həlak olub.
AzerVoice xəbər verir ki, bu barədə Balıkesir Valiliyi açıqlama yayıb.
Bildirilib ki, qeyri-qanuni miqrasiyaya qarşı mübarizə çərçivəsində Sahil Təhlükəsizlik Şimal Egey Qrup Komandanlığı tərəfindən keçirilən əməliyyat zamanı bir qaçaqmalçı və 34 miqrantı daşıyan yüksək sürətli fiber gövdəli qayıq sahil mühafizə katerinə çırpılıb.
Müəyyən olunub ki, ərazidə aparılan axtarış-xilasetmə işləri nəticəsində dənizə düşən miqrantlardan beş nəfər həyatını itirib, bir nəfər isə ağır yaralı vəziyyətdə xəstəxanaya yerləşdirilib. İtkin düşdüyü güman edilən bir miqrantın axtarışı davam edir.
Hadisə ilə bağlı Ayvalık Respublika Prokurorluğu tərəfindən istintaq başladılıb.