BAKI, AzerVoice, Nərmin Ağayeva
Türkiyənin ən xoşbəxt şəhəri seçilən Sinop, təmiz dənizi və təbii gözəllikləri ilə yay mövsümündə minlərlə turisti cəlb edir.
AzerVoice xəbər verir ki, TÜİK-in Həyat Məmnuniyyəti Araşdırmasında illərdir birinci olan Sinop, Hamsilos Təbiət Parkı, Erfelek Tatlıca şəlalələri, Akliman kimi təbiət möcüzələri və tarixi abidələri ilə tanınır. Sinop Mədəniyyət və Turizm müdiri Fatih Güzel şəhərin dəniz turizmi üçün cazibə mərkəzinə çevrildiyini, xüsusilə sakit və təmiz suların yerli və xarici qonaqları cəlb etdiyini bildirib. Onun sözlərinə görə, yay mövsümündə Sinop və ətraf sahil rayonları gündə təxminən 600 min insanı qəbul edir.
İstanbuldan gələn Arzu Şenel və digər ziyarətçilər illərdir Sinopu tətil üçün seçdiklərini, günəş, qum və dənizin mükəmməl birləşməsini burada tapdıqlarını vurğulayıb.
Qeyd edək ki, Qara dənizin ucqar nöqtəsində yerləşən Sinop həm təbii çimərlikləri, həm də tarixi irsi ilə Türkiyənin mühüm turizm mərkəzlərindən biridir.