BAKI, AzerVoice

Türkiyə və İndoneziya iqtisadi əlaqələri genişləndirməyə razılaşıb.

AzerVoice xəbər verir ki, Türkiyənin xəzinə və maliyyə naziri Mehmet Şimşək, İndoneziyanın maliyyə naziri Sri Mulyani İndrawati ilə Ankara şəhərində görüş keçirib.

Nazirlikdən verilən açıqlamada bildirilib ki, prezident Rəcəb Tayyib Ərdoğan və İndoneziya Prezidenti Prabowo Subianto arasında keçirilmiş “Yüksək Səviyyəli Strateji Əməkdaşlıq Şurası” görüşləri çərçivəsində əldə edilən ortaq baxış iqtisadi əlaqələrin daha da dərinləşdirilməsinə zəmin yaradıb. Bu istiqamətdə nazir Şimşək və nazir İndrawati arasında baş tutan görüşdə qlobal və regional makroiqtisadi trendlər, eləcə də ikitərəfli iqtisadi əməkdaşlığın inkişafı müzakirə olunub.

Görüşdə müdafiə sənayesi, yüksək əlavə dəyərli istehsal, süni intellekt, rəqəmsal iqtisadiyyat və üçüncü ölkələrdə birgə layihələr sahəsində əməkdaşlıq imkanları ön plana çəkilib. Tərəflər yaxın zamanda Türkiyə və ya İndoneziyada daha əhatəli təmasların təşkili barədə razılığa gəliblər.

Qeyd edək ki, prezidentlər Ərdoğan və Subianto arasında keçirilən görüşlərdə Türkiyə–İndoneziya münasibətlərinin strateji tərəfdaşlıq səviyyəsinə yüksəldilməsi prioritet kimi qeyd olunub.