Bakı, VOA

Türkiyə Böyük Millət Məclisinin Qurban bayramından sonra ilk işi “kriptovalyuta” bazarının tənzimlənməsi olacaq.

VOA xəbər verir ki, tənzimləmənin ən mühüm məqsədi kriptovalyuta bazarında şəffaflığı artırmaq və investorları qorumaqdır. Bu çərçivədə qaydalara tabe olmayan platformalara ağır sanksiyalar tətbiq olunacaq.

Yeni qaydalara əsasən bu işlə məşğul olan şirkətlər üçün nizamnamə kapitalı tələbi tətbiq ediləcək. Beləcə həm investorlar qorunacaq, həm də bu şirkətlərə qarşı bir sıra sanksiyalar tətbiq olunacaq.

Kriptovalyuta istifadəçiləri ilə münasibətlərin necə qurulacağı və onların necə müəyyən ediləcəyi də qanunla tənzimlənəcək.

Qaydaya əsasən, bu sektorda Kapital Bazarları Qurumunun (SPK) icazəsi ilə fəaliyyət göstərməyə icazə veriləcəkdir. SPK, həmçinin kriptovalyutaların emissiyası, satışı və paylanması üçün səlahiyyətli qurum hesab olunacaq. Həmçinin, bütün köçürmə əməliyyatlarının qeydiyyatı aparılacaqdır.

Qeyd edək ki, Türkiyədə 12 milyon insanın kapital bazarlarında balans hesabı var.

Onu da əlavə edək ki, yeni qaydalar bazar saxtakarlığı, bazarı təhrif edən hərəkətlər və məlumatdan sui-istifadəyə görə cəzaları da müəyyən edəcək. Bu çərçivədə 246 min türk lirəsi ilə 6 milyon lirə arasında inzibati cərimələr tətbiq olunacaqdır.