Bakı, AzerVoice

2024-cü ilin noyabrında ASELSAN ilə Polşanın AMZ Kutno şirkəti arasında əhəmiyyətli bir müqavilə imzalanıb.

AzerVoice xəbər verir ki, bu müqavilə, Polşa Ordusu üçün istehsal olunacaq Yüngül Zirehli Kəşfiyyat və Nəzarət Vasitəsi (LOTR-Kleszcz) üçün radar və elektro-optik sistemlərin tədarükünü əhatə edir. Müqavilə çərçivəsində ASELSAN tərəfindən təmin ediləcək radar və elektro-optik sistemlər, Polşa ordusunun ehtiyaclarını qarşılamaq üçün yüksək texnoloji həllər təklif edəcək.

Bu müqavilə, Polşanın 286 dəst kəşfiyyat və müşahidə sistemlərinin tədarükünə dair elan etdiyi irimiqyaslı layihənin bir hissəsidir. Layihənin 2035-ci ilə qədər davam etməsi planlaşdırılır. Bu sazişin ümumi dəyəri isə 16 milyon 632 min Avro olaraq açıqlanıb.

Bu razılaşma, ASELSAN-ın, Polşa ilə texnologiya və sistem təminatı sahəsindəki əməkdaşlığını daha da gücləndirəcək. Daha əvvəl ASELSAN, zirehli maşınlar üçün radar və elektro-optik sensorlar tədarükü üçün ATEŞ Mobil Sərhəd Təhlükəsizlik Sistemi layihəsini tamamlayaraq Türkiyə Silahlı Qüvvələri üçün müvəffəqiyyətlə tətbiq edib.

ASELSAN-ın əvvəlki layihələrində istifadə etdiyi sistemlər, radar, termal kamera və elektro-optik sensorlar ilə donatılmışdır ki, bunlar avtomobil üzərində quraşdırılaraq gecə-gündüz müşahidə imkanı və hədəf təyini funksiyaları təmin edir. Bu sistemlər həmçinin hədəflərin rəqəmsal xəritələrdə koordinatlarla işarələnməsi və termal kameralarla izlənməsi funksiyaları ilə ATEŞ və COBRA II kimi platformalarda inteqrasiya olunub.