BAKI,VOA, Fərid Mikayılov

Bu ilin payızında Türk Dövlətləri Parlament Assambleyasının növbəti plenar iclası Qırğızıstanda keçiriləcək.

VOA xəbər verir ki, bu barədə Qırğızıstan parlamentinin – Joqorku Keneşin sədri Marlen Mamatəliyev TürkPA-nın baş katibi Ramil Həsənov ilə görüşündə bildirib.

Mamatəliyev qeyd edib ki, parlament diplomatiyası vasitəsilə qardaş xalqlar arasında münasibətlərin möhkəmləndirilməsi mühüm əhəmiyyət daşıyır.

Onun sözlərinə görə, parlamentin yeni çağırışı Türk dövlətlərinin parlamentləri ilə əməkdaşlığın gücləndirilməsində və assambleya çərçivəsində birgə layihələrin həyata keçirilməsində maraqlıdır.

Parlament sədri əlavə edib ki, bu ilin payızında Qırğızıstanda keçiriləcək plenar iclas çərçivəsində əməkdaşlığın genişləndirilməsi və türk xalqları arasında əlaqələrin dərinləşdirilməsi istiqamətində mühüm danışıqlar aparılacaq.

TürkPA-nın baş katibi Ramil Həsənov isə təşkilat çərçivəsində həyata keçirilən layihələr və gələcək planlar barədə məlumat verib.

O bildirib ki, Qırğızıstanda keçiriləcək plenar iclasa ciddi hazırlıq işləri aparılır.

Görüş zamanı assambleyaya üzv ölkələrin parlament rəhbərlərinin yaxın zamanda keçiriləcək qeyri-rəsmi görüşü və bu görüşdə müzakirə olunacaq məsələlər də diqqətə çatdırılıb.

Tərəflər həmçinin TürkPA-nın digər beynəlxalq parlament təşkilatları ilə əməkdaşlığının genişləndirilməsi məsələsini müzakirə ediblər.