Yaponiya Baş naziri Sanae Takaiçi İran Prezidentindən Babül-Məndəb boğazında husilərin mümkün hücumlarının qarşısının alınmasına kömək etməsini istəyib. Tərəflər telefon danışığı zamanı regional təhlükəsizlik məsələlərini müzakirə ediblər. Takaiçi İran və Oman arasında Hörmüz boğazı ilə bağlı danışıqlardakı irəliləyişdən məmnunluğunu bildirib. Yaponiya müharibənin diplomatik yollarla dayandırılmasını dəstəklədiyini açıqlayıb. Pezeşkian isə İranın regionda sabitliyi pozmaq niyyətində olmadığını bildirib və Yaponiyanın səylərini alqışlayıb.

İran Prezidenti Məsud Pezeşkian ABŞ və İsrailin İrana qarşı hücumlarda süni intellekt məlumatlarından istifadə etdiyini iddia edib. O, bu barədə Tehran Universitetində keçirilən tədbirdə danışıb. Pezeşkianın sözlərinə görə, hücumların məqsədi İranda təhlükəsizlik böhranı yaratmaq və ölkəni sosial-iqtisadi çətinliklərə sürükləmək olub. İran prezidenti ABŞ və İsrailin planlarının süni intellekt məlumatları, casus şəbəkələri və daxili tərəfdarlarına əsaslandığını bildirib. O, bu hesablamaların uğursuz olduğunu iddia edib. Pezeşkian açıqlamasında iddialarını təsdiqləyən konkret sübutlar təqdim etməyib. İran rəhbərliyi daha əvvəl də xarici qüvvələri ölkədə sabitliyi pozmağa çalışmaqda ittiham edib. Açıqlama Tehranla Vaşinqton və Təl-Əviv arasında gərginliyin davam etdiyi dövrdə verilib.

İran Prezidenti Məsud Pezeşkian Müctəba Xamenei ilə yeddi saatlıq görüş keçirdiyini açıqlayıb. Onun sözlərinə görə, Ali rəhbər görüş zamanı milli birliyin və həmrəyliyin qorunmasının vacibliyini vurğulayıb. Görüşdə insanların yaşayış vəziyyətinə diqqət yetirilməsinin əsas məsələlərdən biri olduğu bildirilib. Görüş ötən ay Pezeşkianın prezidentliyinin üçüncü ilinin başlanğıcı ərəfəsində baş tutub. İran dövlət mediası görüş barədə məlumat yayıb. Tərəflərin ölkənin daxili və xarici vəziyyətini müzakirə etdiyi qeyd olunub. Açıqlama İranın iqtisadi və regional çətinliklərlə üzləşdiyi bir vaxtda verilib.

İran Prezidenti Məsud Pezeşkian ölkə rəhbərliyinin qərarlarının arxasında sona qədər dayanacaqlarını bildirib. O, müharibənin davam etdirilib-etdirilməməsi məsələsində hərbi rəhbərliyin vəziyyəti daha yaxşı qiymətləndirə biləcəyini deyib. Pezeşkian hərbi rəhbərliyin İranın imkanlarını və döyüş şəraitini yaxından bildiyini vurğulayıb. Prezidentin sözlərinə görə, yekun qərar ölkə rəhbərliyi tərəfindən qəbul ediləcək. O, hansı qərarın verilməsindən asılı olmayaraq, İran xalqının bu mövqeyi dəstəkləyəcəyini bildirib. Pezeşkian mübarizəni ölümə qədər davam etdirməyə hazır olduqlarını deyib. İran Prezidenti döyüşməkdən və mövqeyini qorumaqdan qorxmadığını vurğulayıb. O, mümkün sui-qəsd təhlükəsinin də onu mövqeyindən çəkindirməyəcəyini bildirib.

İran Hörmüz boğazı ilə bağlı Omanla razılaşma əldə etməyə çox yaxın olduğunu açıqlayıb. İranın xarici işlər naziri Abbas Əraqçi danışıqların əsasən gəmiçilik marşrutlarına yönəldiyini bildirib. Onun sözlərinə görə, Tehran daha əvvəl Pakistanda əldə olunmuş anlaşmanın beşinci bəndini yerinə yetirir. Razılaşmaya əsasən, Hörmüz boğazında hərəkətin bir ay ərzində normal vəziyyətə qayıtması nəzərdə tutulurdu. Əraqçi iki həftə ərzində hərəkətin normal səviyyənin 60 faizinə çatdığını bildirib. İran ABŞ-ni Hörmüz boğazında yeni keçid yolları yaratmağa çalışmaqda ittiham edib. Omanla danışıqlarda daimi marşrut müəyyənləşdirilənədək müvəqqəti gəmiçilik yolunun yaradılması müzakirə olunur. İran və Omanın hərbi və dəniz qüvvələri arasında da məsələ ilə bağlı danışıqlar aparılıb.

İran Prezidenti Məsud Pezeşkian HƏMAS rəhbərliyi ilə telefon danışığında Tehranın Qəzza danışıqlarında Fələstin tərəfinin qəbul edəcəyi bütün qərarları dəstəkləyəcəyini bildirib. Bu açıqlama Donald Trampın HƏMAS-ın silahsızlanmağa razılaşdığı barədə iddiasından sonra verilib. İsrail HƏMAS tam silahsızlaşdırılmadan Qəzzadan çıxmayacağını bildirir, HƏMAS isə İsrail qoşunlarının tam geri çəkilməsini əsas şərt kimi irəli sürür. Baş nazir Benyamin Netanyahu isə Trampın planını qəbul etmədiklərini açıqlayıb.

Yaxın Şərq üzrə ekspert Rufiz Hafizoğlu hesab edir ki, İran–ABŞ qarşıdurması yeni mərhələyə keçərək İranın ərəb və ümumilikdə İslam dünyası ilə üz-üzə qoyulması ssenarisinə doğru inkişaf edir. Onun sözlərinə görə, ABŞ ilə aparılan mümkün danışıqların taleyi İran prezidentindən deyil, Ali Rəhbər Əli Xamenei və SEPAH rəhbərliyinin qərarlarından asılıdır. Ekspert həmçinin Tehranın ABŞ ilə danışıqlar aparmasını, lakin digər ölkələrin İsraillə təmaslarını tənqid etməsini İranın xarici siyasətində ikili standartların göstəricisi kimi qiymətləndirir.

İran Prezidenti Məsud Pezeşkian istefa verəcəyi ilə bağlı yayılan iddiaları təkzib edərək vəzifəsini icra etməyə davam edəcəyini bildirib. Pezeşkian, həmçinin İranın ali dini lideri Müctəba Xamenei və Silahlı Qüvvələrlə fikir ayrılığı yaşadığı barədə iddiaları da rədd edib. Məlumata görə, Pezeşkianın xalqa videomüraciəti dörd hissə şəklində yayımlanacaq.

İran Xarici İşlər Nazirliyi Tehran və Vaşinqton arasında hazırda birbaşa danışıqların aparılmadığını açıqlayıb. Bununla yanaşı, İranın regional ölkələrlə diplomatik təmasları davam edir. Son günlər Abbas Əraqçi Səudiyyə Ərəbistanı, Türkiyə və Pakistan rəsmiləri ilə əlaqə saxlayıb. Oman və İran arasında Hörmüz boğazındakı vəziyyətlə bağlı danışıqlar da davam edir. Prezident Məsud Pezeşkian İranın regionda gərginliyi artırmaq istəmədiyini, lakin milli maraqlarını qorumağa hazır olduğunu bəyan edib. Tehran həm diplomatiyaya açıq olduğunu, həm də mümkün qarşıdurmaya hazır olduğunu bildirir.

İran Prezidenti Məsud Pezeşkian bildirib ki, yaxın vaxtlarda imzalanmış memorandum İran Ali Milli Təhlükəsizlik Şurası üzvlərinin ortaq qərarının nəticəsidir və gələcəkdə ölkənin xarici siyasətinin əsas istiqamətlərindən birinə çevrilə bilər. Pezeşkian vurğulayıb ki, əsas məqsəd qarşı tərəfin də üzərinə götürdüyü öhdəliklərə sadiq qalmasını təmin etməkdir.

İran Prezidenti Məsud Pezeşkian xalqın ölkənin gələcəyini müəyyən edəcəyini bildirib. O, İran xalqını ABŞ və İsraillə münaqişə dövründə göstərdiyi dözümlülüyə görə "qəhrəman" adlandırıb. Pezeşkian münaqişənin başlanğıcını 2024-cü il iyulun 31-də İsmayıl Həniyənin Tehranda öldürülməsi ilə əlaqələndirib. Prezident həmin vaxt Həniyənin onun andiçmə mərasimində iştirak etmək üçün İranda olduğunu xatırladıb. Onun sözlərinə görə, İran müharibələrə və təzyiqlərə baxmayaraq yolunu öz xalqının iradəsi ilə müəyyən edəcək. Bəyanat sosial şəbəkədə paylaşılıb.

İran Prezidenti Məsud Pezeşkian vətəndaşları möhkəm olmağa çağırıb. O bildirib ki, İran haqsızlıq qarşısında geri çəkilməməlidir. Prezident eyni zamanda dövlətin öz vətəndaşlarına qarşı ədalətsizlik etməməsinin vacibliyini vurğulayıb. Pezeşkian İranın "özünəməxsus müqavimət modeli" yaratdığını söyləyib. O, çıxışında "düşmən" ifadəsini işlədib, lakin konkret tərəfin adını çəkməyib. İran rəsmisinin bəyanatı regiondakı gərginlik fonunda səsləndirilib.