ROKETSAN-ın baş direktoru Murat İkinci Türkiyənin müdafiə sənayesindəki cari layihələr və Çelik Kubbe sistemi ilə bağlı mühüm açıqlamalar verib. O, ROKETSAN-ın tankəleyhinə raketlərdən tutmuş ballistik və qanadlı raketlərə qədər bir çox sahədə kütləvi istehsalı sürətlə davam etdirdiyini bildirib. Murat İkinci xüsusilə ballistik raketlərin istehsal prosesinə toxunaraq qeyd edib ki, həm "TAYFUN" ballistik raketləri, həm də "SOM" qanadlı raketlərinin istehsalı və tədarükü 24 saatlıq iş rejimi ilə həyata keçirilir.

Türkiyənin Maşın və Kimya Sənayesi (MKE) şirkəti tərəfindən hazırlanan "TOLGA" yaxın hava müdafiə sistemi qlobal silah bazarında asimmetrik təhdidlərə qarşı ən effektiv həll yollarından biri kimi ön plana çıxıb. MKE baş direktoru İlhami Keleşin bildirdiyinə görə, xüsusilə Rusiya-Ukrayna müharibəsindən sonra dronların ucuz və geniş yayılmış hərbi vasitəyə çevrilməsi yaxın hava müdafiəsi ehtiyacını artırıb. "TOLGA" bu boşluğu doldurmaq üçün Türkiyənin "Polad Qübbə" (Çelik Kubbe) hava hücumundan müdafiə layihəsinin alt seqmentini, yəni çox alçaq hündürlükdəki təhdidləri zərərsizləşdirmək üçün dizayn edilib.

Belçikanın müdafiə naziri Teo Franken Brüsseldə keçirilən Avropa Müdafiə Sərgisi və Konfransı (BEDEX) çərçivəsində Türkiyənin ASELSAN şirkətinin stendini ziyarət edib. Nazir Franken Türkiyənin müdafiə sənayesi sahəsindəki nailiyyətlərini yüksək qiymətləndirərək bildirib ki, Türkiyə böyük və güclü bir ölkə olmaqla yanaşı, həm də qüdrətli orduya və zəngin hərbi təcrübəyə malikdir. O, Belçikanın müəyyən imkanlara sahib olmasına baxmayaraq, Türkiyənin bu sahədəki geniş təcrübəsindən öyrənilməli olan bir çox məqamların olduğunu vurğulayıb.

Türkiyənin Nəqliyyat və İnfrastruktur naziri Abdulkadir Uraloğlu Avropa Hava Naviqasiyası Təhlükəsizliyi Təşkilatının (EUROCONTROL) son məlumatlarına əsasən, ölkənin hava naviqasiyası xidmətlərində bütün zamanların ən yüksək göstəricisinə uşatdığını bildirib. Rəsmi statistikaya görə, 2026-cı ilin yanvar ayında Türkiyə 1 milyon 671 bin 405 xidmət vahidi ilə EUROCONTROL sistemi daxilində indiyədək qeydə alınan ən yüksək səviyyəyə çatıb. Bu göstərici ilə Türkiyə, təşkilatın üzvü olan 42 ölkə arasında liderliyini perçinləyib.

Türkiyənin müdafiə sənayesi çərçivəsində hazırlanmış 12,7 mm uzaqdan idarə olunan silah sistemi quru platformalarından sonra dəniz platformalarında da təhlükəsizlik qüvvələrinin istifadəsinə təqdim olunub. SARSILMAZ şirkətinin yaydığı məlumata görə, ARES Tərsanəsi və Meteksan Müdafiə tərəfindən hazırlanmış Türkiyənin pilotsuz silahlı dəniz vasitəsi (SİDA) ULAQ İstanbul Tərsanəsi Komandanlığında keçirilən “Dəniz platformalarının xidmətə qəbul edilməsi, bayraq qaldırma və ilk sac kəsmə” mərasimi çərçivəsində təhvil verilib. Mərasimdə Rəcəb Tayyib Ərdoğan iştirak edib.

Türkiyənin milli jet təyyarəsi HÜRJET, Ərzurumda sıfırın altında 21 dərəcəyə qədər düşən dondurucu soyuq və ağır qış şəraitində keçirilən yer və yüksək irtifa performans testi fəaliyyətlərini uğurla tamamlayıb. Türkiyə Müdafiə Sənayesi Başçılığı koordinasiyasında Türk Hava və Kosmos Sənayesi (TUSAŞ) tərəfindən hazırlanmış HÜRJET-in iki prototipi testlər üçün Ərzuruma yönəldilmişdi.

Türkiyənin müdafiə sənayesi nəhəngi ASELSAN, dəniz platformalarına güc qatan və dünya sularında özünü doğrultmuş SMASH (MUHAFIZ) Uzaqdan Komandalı Stabilləşdirilmiş Silah Sistemləri ailəsinə yeni texnoloji qabiliyyətlər qazandırır. Türkiyədə "MUHAFIZ" adı ilə tanınan bu sistemlər 30 mm, 25 mm və 12,7 mm kimi müxtəlif çaplı seçimləri ilə uzaqdan idarə olunan, yüksək dəqiqlikli müdafiə həlli kimi istifadəyə verilib. Sistem, lülədən asılı olmayaraq hərəkət edən həssas stabilləşdirici yönləndirici sayəsində ən çətin dəniz şəraitində və platforma hərəkət halında olarkən belə nişan xəttini hədəf üzərində sabit saxlaya bilir.

Türkiyə, Müdafiə Sənayesi İcra Komitəsinin qərarları çərçivəsində Çelik Kubbe hava müdafiə sistemini inventarına əlavə edib. Türkiyə Prezidenti Rəcəb Tayyib Ərdoğan layihənin uğurla həyata keçirildiyini və sistemin artıq istifadəyə verildiyini açıqlayıb. Ərdoğan bildirib ki, Müdafiə Sənayesi İcra Komitəsi çərçivəsində başlayan layihələrin nəticələri bir-bir toplanır və Çelik Kubbe də bu müvəffəqiyyətlərin nümunəsidir. Sistem, ölkənin strateji hava müdafiəsini gücləndirəcək və həm Türkiyənin, həm də müttəfiqlərinin təhlükəsizliyinə dəstək olacaq.

Türkiyə ilə Azərbaycan arasında müdafiə sənayesi əməkdaşlığının yeni nəticəsi olaraq, Məhsul və Kimya Sənayesi Qurumu (MKE) Azərbaycanda “Maşın və Kimya Azərbaycan (MKA)” adlı şirkət yaradıb. Şirkət MKE-nin xaricdəki ilk iştirakı kimi fəaliyyətə başlayıb. Eyni zamanda, Açıq Dəniz Nəzarət Gəmisi Layihəsi çərçivəsində inşa olunan bir gəmiyə Rumıniyaya satış həyata keçirilib. Dəniz Qüvvələri Komandanlığı üçün daha üstün xüsusiyyətlərə malik olacaq “Seferihisar” gəmisinin isə İstanbul Tersanesi Komandanlığında inşa edilərək donanmaya təhvil veriləcəyi bildirilib.

Avropa İttifaqı (Aİ) Kanadanın 150 milyard avro dəyərindəki “Avropa Təhlükəsizlik Fəaliyyəti” (SAFE) ortaq müdafiə maliyyələşdirmə proqramına qatıldığını açıqlayıb. Aİ Komissiyası Prezidenti Ursula fon der Leyen sosial media paylaşımında, Kanadanın proqramda iştirakının təsdiqləndiyini bildirərək, “Xoş gəlmisiniz Kanada” sözlərini deyib. Proqram çərçivəsində Kanada Aİ xaricində xüsusi hüquqlara malik yeganə ölkə olacaq və bu iştirak Kanadalı şirkətlər üçün müdafiə sahəsində milyardlarla dollarlıq imkanlar yaradacaq. SAFE proqramı, iştirakçı ölkələr arasında ortaq tədarükləri gücləndirməklə, müdafiə sənayesini inkişaf etdirməyi və təhlükəsizliyi artırmağı hədəfləyir.

Mali Respublikasında keçirilən BAMEX 2025 müdafiə sərgisi çərçivəsində Türkiyənin Akıncılar Taktik Tekstil şirkəti tərəfindən təqdim olunan yerli balistik məhsullar ziyarətçilərin xüsusi diqqətini çəkib. Şirkətin nümayəndəsi, layihə mühəndisi Enes Bitigen tədbirdə çıxışı zamanı bildirib ki, Akıncılar Taktik Tekstil artıq NATO standartlarına uyğun şəkildə fərdi və zirehli vasitələrə tətbiq edilən balistik qoruyucu sistemlər istehsal edir.

Türkiyənin müdafiə və aviasiya sənayesinin 2025-ci ilin ilk 10 ayında ümumi ixrac həcmi 6,7 milyard ABŞ dolları olub. Bu barədə Türkiyə Prezidentliyinin Müdafiə Sənayesi İdarəsinin (SSB) rəhbəri professor Haluk Görgün sosial media hesabında məlumat paylaşıb. Görgün bildirib ki, təkcə oktyabr ayında sektorun ixracı 708 milyon dollara çatıb. O, qeyd edib ki, ilin ilk 10 ayında xidmət ixracı istisna olmaqla ümumi ixrac ötən ilin eyni dövrü ilə müqayisədə 31 faiz artaraq 6,7 milyard dollara yüksəlib.