İran Ordusunun sözçüsü, briqada generalı Məhəmməd Ekreminiya ABŞ və İsrailin İran əleyhinə həyata keçirdiyi əməliyyatların hədəflərinə çatmadığını bildirib. Ekreminiya qeyd edib ki, bu yanaşma emosional deyil, tam şəkildə strateji əsaslara söykənir və uzunmüddətli təhlükəsizliyin təmin olunmasına xidmət edir.

Yaxın Şərqdə davam edən müharibə enerji bazarlarını sarsıtdığı bir vaxtda, OPEC+ neft kartelinin səkkiz üzvü may ayından etibarən hasilat kvotasını gündəlik 206 min barel artıracaqlarını elan ediblər.

İsrail Ordu Radiosu təhlükəsizlik mənbələrinə istinadən, İsrailə məxsus hər hansı hərbi gəminin hədəf alınması barədə məlumatları rəsmən təkzib edib.

İsrail ordusu Livanın "Hizbullah" hərəkatını tərksilah etmək hədəfinə nail olmağın çətinliyini qəbul edərək, bunun üçün bütün Livan ərazisinin tam işğalının lazım olduğunu bildirib. "Haaretz" qəzetinin məlumatına görə, ordu rəsmiləri müharibənin Hizbullahın silahlı gücü qalmaqla başa çata biləcəyi ehtimalını dəstəkləyiblər. Yüksək rütbəli zabitlərdən birinin qeyd etdiyi kimi, qruplaşmanın tərksilah edilməsi hazırkı hərbi əməliyyatların birbaşa hədəfi deyil, bu, uzun zaman və siyasi gedişlər tələb edən bir prosesdir.

İranın xarici işlər naziri Abbas Əraqçi ABŞ və İsrailin Fars körfəzi sahilində yerləşən Buşehr Nüvə Enerji Stansiyasına endirdiyi zərbələrlə bağlı kəskin xəbərdarlıq edib. Nazir sosial media hesabından paylaşdığı mesajda beynəlxalq birliyin bu hücumlar qarşısındakı səssizliyini tənqid edib. Əraqçi Qərb dövlətlərinin Ukraynadakı Zaporojye nüvə stansiyası ətrafındakı döyüşlərə göstərdiyi kəskin reaksiyanı xatırladaraq, Buşehr stansiyasının artıq dördüncü dəfə bombalandığını vurğulayıb. O bildirib ki, stansiyada baş verə biləcək hər hansı radioaktiv sızıntı və ya serpinti təkcə İranı deyil, Körfəz Əməkdaşlıq Şurasına üzv olan qonşu ərəb ölkələrinin paytaxtlarındakı həyatı tamamilə iflic edə və sonlandıra bilər.

İraqın Bəsrə vilayət rəhbərliyi, Şələmçə sərhəd-keçid məntəqəsinin İran tərəfinin hücuma məruz qalmasından sonra burada həm ticarət dövriyyəsinin, həm də sərnişin daşınmasının tamamilə dayandığını elan edib.

İranın cənubundakı Xuzistan bölgəsində yerləşən Bandar İmam neft-kimya kompleksi hava zərbəsi nəticəsində zədələnib. Xuzistan vilayətinin rəsmisi bildirib ki, zərbələr Fajr 1 və Fajr 2 neft-kimya şirkətlərini, eləcə də yaxınlıqdakı digər sənaye obyektlərini hədəf alıb.

İsrailin şimalında yerləşən Hayfa şəhəri və ətraf ərazilər raket hücumuna məruz qalıb. Hadisə nəticəsində altı nəfər xəsarət alıb, onlardan bəzilərinin psixoloji sarsıntı keçirdiyi bildirilir. Bir nəfərin isə partlayış dalğası nəticəsində yaranan dağıntıdan zərər gördüyü qeyd olunur.

İranın keçmiş xarici işlər naziri Cavad Zərif ölkəsini "qələbə elan etməyə və həm bu münaqişəni bitirən, həm də növbətisinin qarşısını alan bir sövdələşməyə" çağırıb. Uzun illər İranın nüvə proqramı üzrə ABŞ və digər dövlətlərlə apardığı danışıqların əsas siması olan Zərif, Tehran üçün əlverişli şərtlərlə ABŞ və İsrail ilə müharibəni dayandırmağın yollarını cızan bir "yol xəritəsi" təqdim edib.

Türkiyənin ABŞ və İsrailin İrana qarşı başlatdığı hərbi əməliyyatların regional müharibəyə çevrilməsinin qarşısını almaq üçün göstərdiyi diplomatik səylər fonunda, Vaşinqtondakı bəzi qrupların Ankara əleyhinə fəaliyyətləri kəskinləşib. Sözügedən hesabatda Türkiyənin NATO-dakı müttəfiqlik prioritetlərindən uzaqlaşdığı və bəzi dini strukturlardan siyasi məqsədlər üçün istifadə etdiyi iddia olunur. Lakin FDD-nin bu həmləsinə ABŞ-ın nüfuzlu siyasi dairələrindən sərt reaksiya gəlib. Donald Trampın birinci prezidentliyi dövründə Almaniyadakı səfiri və Milli Kəşfiyyat Direktorunun vəzifəsini icra edən Riçard Qrenell sosial media hesabından FDD-yə etiraz bildirib. Qrenell vurğulayıb ki, Türkiyə 1952-ci ildən NATO üzvüdür və "Türkiyə ittifaqdan ayrılarsa, NATO-nun mövcudluğu sona çatar".

Livanın Baş naziri Nəvaf Salam paytaxt Beyrutda çıxışı zamanı ölkədə vəziyyətin “çox kritik” olduğunu bildirib. Nəvaf Salam eyni zamanda cənub bölgələrində qalan vətandaşlara təşəkkürünü bildirib, onların cəsarətini yüksək qiymətləndirərək dövlətin onları dəstəkləyəcəyini və bütün zəruri ehtiyacların qarşılanması üçün səylərin davam etdiriləcəyini vurğulayıb

İraqın Xalq Səfərbərlik Qüvvələri son 24 saat ərzində ABŞ və İsrail tərəfindən iki dəfə zərbəyə məruz qaldığını açıqlayıb. Qurumun açıqlamasında qeyd olunub ki, hücumlar nəticəsində insan tələfatı qeydə alınmayıb. Ekspertlər vurğulayır ki, sözügedən qüvvələr İraq ordusunun tərkibində fəaliyyət göstərsə də, bəzi briqadalarının İranla əlaqəli olması regionda hərbi gərginliyin artmasına səbəb olur.