BAKI,AzerVoice

İngiltərənin Liverpul klubu kolumbiyalı hücumçu Luis Diazin Almaniyanın Bavariya klubuna mümkün transferi fonunda İspaniyanın Real Madrid komandasının braziliyalı ulduzu Rodriqonun xidmətində ciddi şəkildə maraqlanır.

AzerVoice xəbər verir ki, Rodriqonun Enfildə keçidi artıq getdikcə daha real hesab olunur.

Danışıqlar çərçivəsində transferin bir hissəsi kimi Liverpulun fransalı müdafiəçisi İbrahima Konatenin də Real Madridə təklif ediləcəyi ehtimal olunur. Qeyd edək ki, Konatenin Liverpulla müqaviləsi 2025-ci ilin yayında başa çatır ki, bu da onun satışını asanlaşdıran amillərdən biri sayılır.

Klublar arasında əvvəllər Trent Aleksander-Arnoldun Real Madridə keçidi ilə bağlı təmaslar qurulub və yeni danışıqların bu zəmin üzərində aparıldığı bildirilir.

24 yaşlı Rodriqo hazırda Real Madriddə əsas heyətdə mövqeyini qorumağa çalışsa da, Kilian Mbappe və Endrik kimi yeni hücumçuların gəlişi fonunda onun oynama vaxtının məhdudlaşacağı gözlənilir.

Rodriqo Real Madridlə 270 oyunda 68 qol və 51 məhsuldar ötürmə ilə fərqlənib. Lakin futbolçunun illik 10 milyon avroya yaxın maaşı səbəbilə Çelsi və digər İngiltərə klublarının transferdən geri çəkildiyi qeyd olunur.

Növbəti günlərdə braziliyalı oyunçunun klub rəhbərliyi ilə gələcəyinə dair görüş keçirəcəyi və yekun qərarın veriləcəyi gözlənilir.