BAKI,AzerVoice
Səudiyyə Ərəbistanı ötən il keçirilən Həcc mövsümünün bütün sahələrdə uğurlu və müstəsna keçdiyini açıqlayıb. Rəsmi məlumatlara əsasən, 1446-cı il Həcci son 50 ilin ən yaxşı mövsümü hesab olunur və zəvvarların məmnunluq səviyyəsi 91 faizə yüksəlib. Həmçinin müqəddəs məkanlarda hazırlıq işlərinin 50 faizinin tamamlandığı bildirilib. Məkkə və Mədinədə 71 tarixi və mədəni məkanın restavrasiya etdirildiyi, üç milyondan çox ziyarətçi tərəfindən ziyarət edildiyi və məmnunluq göstəricisinin 95 faiz olduğu vurğulanıb.
AzerVoice xəbər verir ki, bu açıqlamalar Ciddədə keçirilən və beşinci dəfə təşkil olunan Həcc Konfransı və Sərgisinin açılışında səsləndirilib. “Məkkədən dünyaya” şüarı ilə keçirilən tədbirdə “Həcc və Hərəmeyn tarixi” adlı yeni elmi təşəbbüs təqdim olunub. Layihə Həccin tarixini İslamdan əvvəlki dövrdən başlayaraq Səudiyyə Ərəbistanı dövrünə qədər sənədləşdirməyi hədəfləyir.
Konfransı Məkkə bölgəsinin müavin əmiri şahzadə Səud bin Mişal bin Əbdüləziz açıb. Tədbir üç gün davam edəcək və müxtəlif sahələr üzrə 50-dən çox yerli və beynəlxalq mütəxəssis iştirak edəcək. Konfrans Həccin elmi müstəvidə sənədləşdirilməsi, mədəni irsin qorunması və müasir yanaşmaların tətbiqi baxımından mühüm platforma kimi qiymətləndirilir.
Açılış nitqində şahzadə Səud bin Mişal Həzrət Kral Salman bin Əbdüləzizin mesajını çatdıraraq, Səudiyyə Ərəbistanının Həccə xidmət etməyi tarixi məsuliyyət və dini borc kimi qəbul etdiyini bildirib. O, 1446-cı il Həcc mövsümünün təşkilati və xidmət baxımından yüksək səviyyədə keçirildiyini qeyd edib və növbəti illərdə xidmətlərə daha da təkmil yanaşma tətbiq ediləcəyini bildirib.
Kral Əbdüləziz Araşdırmaları Mərkəzinin İdarə Heyətinin sədri şahzadə Feysəl bin Salman öz çıxışında Həccin sadəcə mövsümi ibadət deyil, tarix boyunca tövhidə doğru uzanan mənəvi yolçuluq olduğunu deyib. O, Səudiyyə dövlətinin tarixindən bu günə qədər Həccə xidmət etməyi müstəqim bir siyasi və dini xətt kimi davam etdirdiyini bildirib.
Həcc və Ümrə naziri Dr. Töfiq ər-Rabiə qeyd edib ki, 1446-cı ilin Həcci son 50 ildə ən uğurlu mövsüm kimi qeydə alınıb. O, zəvvarların məmnunluq göstəricisinin 2022-ci ildəki 74 faizdən 91 faizə yüksəldiyini bildirib. Nazirin sözlərinə görə, növbəti Həcc mövsümünə hazırlıqlar 13 Zilhiccə tarixindən başlayıb və bütün dövlət qurumlarının iştirakı ilə davam edir.
Nazir həmçinin müqəddəs məkanların 50 faizinin artıq hazır olduğunu, qalan işlərin Zilqədə ayının əvvəlində tamamlanacağını bəyan edib. Yaşayış və mehmanxana obyektlərinin 70 faizinin hazır olduğu, “Nusuk” tətbiqinin istifadəçi sayının 40 milyonu keçdiyi və süni intellekt texnologiyaları ilə təkmilləşdirildiyi açıqlanıb.
Konfrans Kral Salman bin Əbdüləzizin himayəsi altında, Həcc və Ümrə Nazirliyinin təşkilatçılığı və Zəvvarlara Xidmət Proqramının əməkdaşlığı ilə keçirilir. Tədbirə yerli və beynəlxalq rəsmi nümayəndəliklər, akademiklər və Həcc missiyaları qatılıb. Konfrans Həcc xidmətlərində modern yanaşmaların, innovativ texnologiyaların və beynəlxalq əməkdaşlığın gücləndirilməsi baxımından qlobal platforma kimi dəyərləndirilir.