İranın silah istehsalı səviyyəsinə yaxın – 60 faiz zənginləşdirilmiş uran ehtiyatı İsrailin iyunun 13-də nüvə obyektlərinə hücumundan əvvəl bir qədər artıb. Bu barədə Beynəlxalq Atom Enerjisi Agentliyinin (BAEA) gizli hesabatında məlumat verilib. Agentliyin üzv dövlətlərə göndərdiyi rüblük sənəddə bildirilir ki, 13 iyun tarixinə olan qiymətləndirməyə əsasən, İranın sentrifuqalarda daha da zənginləşdirilə bilən uran heksaflorid formasında 60 faiz dərəcəli zənginləşdirilmiş uran ehtiyatı 440,9 kiloqram təşkil edib. Hesabatda vurğulanır ki, bu miqdar uran zənginləşdirmə səviyyəsi artırılacağı halda 10 nüvə bombası hazırlamaq üçün kifayət edə bilər.

İsrail Ordusunun Baş Qərargah rəisi Eyal Zamir Qəzza zolağında “Gideon Arabaları” əməliyyatının ikinci mərhələsinin başladığını elan edib. O bildirib ki, əməliyyatın məqsədi müharibənin hədəflərinə çatmaq üçün döyüşlərin intensivləşdirilməsi və hərbi manevrlərin dərinləşdirilməsidir. “Əsirlərin geri qaytarılması həm mənəvi, həm də milli vəzifədir. Biz HƏMAS-ın əsas dayaq nöqtələrinə zərbələr endirməyə davam edəcəyik və onun hər yerdə sıxışdırıldığını hiss etməsinə səbəb olacağıq” – deyə, Zamir vurğulayıb.

İsrail ordusu Kuneytra vilayətində yerləşən bir qəsəbəyə basqın təşkil edib. İsrail qüvvələri keçirilən əməliyyat zamanı 7 nəfəri həbs edib. Suriya dövlət xəbər agentliyi SANA, İsrail qüvvələrinin Suriyaya basqın təşkil etdiyini və 7 nəfəri saxladığını bildirib. İsrail ordusunun açıqlamasında isə “terror fəaliyyəti şübhəsi” ilə şəxslərin saxlandığı qeyd olunub. İsrail ordusu isə yayımladığı bəyanatda, əsgərlərin “Suriyanın cənub bölgəsində terror fəaliyyəti ilə əlaqəsi olduğundan şübhələnilən bir neçə nəfəri” saxladıqlarını bildirib. Rəsmi şəxslər həbs edilənlərin İsrailə aparılaraq dindirildiyini açıqlayıb.

Birləşmiş Millətlər Təşkilatının (BMT) Livandakı Müvəqqəti Sülhməramlı Qüvvələri (UNIFIL) açıqlayıb ki, Livanın cənubunda yol təmizləmə işi aparan sülhməramlı qüvvələrin yaxınlığına işğalçı İsrail ordusu tərəfindən 4 qumbara atılıb. Bu hadisə, 27 noyabr 2024-cü ildə qüvvəyə minən atəşkəs sazişindən bəri "ən ciddi hücumlardan biri" hesab olunur. UNIFIL-in Telegram hesabında yayımlanan açıqlamada, Livanın cənubunda yerləşən yolları bağlayan baryerlərin sülhməramlı qüvvələr tərəfindən təmizləndiyi zaman İsrailə məxsus dronların Mavi Xətt yaxınlığındakı BMT mövqeləri yaxınlığına dörd əl qumbarası atdığı bildirilib.

İsrail ordusunun səhər saatlarından bəri Qəzza Zolağının müxtəlif bölgələrinə təşkil etdiyi hücumlardan 13 Fələstinli, o cümlədən bir hamilə qadın və onun körpəsi həlak olub. AzerVoice xəbər verir ki, xəstəxana mənbələri və şahidlərin verdiyi məlumata görə, İsrail ordusu Qəzza Zolağının şimalındakı Qəzza şəhərinin yanında, həmçinin şimal və cənub bölgələrində evləri, çadırləri və dinc sakinlərin toplandığı yerləri hədəf alıb. İsrail ordusu Qəzza şəhərinin qərbindəki Sayadin limanı ətrafındakı bir mənzili vurub. Həmin hücumda bir hamilə qadın və onun bətnindəki körpəsi də daxil olmaqla 5 Fələstinli həyatını itirib. Qəzza şəhərinin mərkəzində yerləşən Derec məhəlləsində, Fevahir küçəsi yaxınlığındakı bir evə helikopterlə edilən hücumda 3 Fələstinli ölüb.

İsrailin hücumları və blokadası səbəbiylə aclığın yaşandığı Qəzzada aclıqdan ölənlərin sayı son 24 saatda 6 nəfər artaraq 131-i uşaq olmaqla 367-yə çatıb. Bu barədə Qəzzadakı Fələstin Səhiyyə Nazirliyi yazılı açıqlama yayıb. Bildirilib ki, bölgədə uzun müddətdir davam edən ərzaq çatışmazlığı və yardım qıtlığı nəticəsində ölüm halları kritik həddə çatıb. Açıqlamaya görə, 2023-cü il 7 oktyabrdan bu günədək Qəzzada aclıqdan ölənlərin ümumi sayı 367 nəfərə yüksəlib. Onlardan 131-i uşaqlardır. Beynəlxalq ictimaiyyətin diqqətini çəkən bu vəziyyətlə bağlı Birləşmiş Millətlər Təşkilatının (BMT) dəstəklədiyi Qida Təhlükəsizliyi Mərhələ Təsnifatı (IPC) tərəfindən yayımlanan son hesabatda, 15 avqust 2025 tarixindən etibarən Qəzzada aclığın ən yüksək – fəlakət səviyyəsi olan 5-ci mərhələyə çatdığı sübutlarla təsdiqlənib.

Rəsmi dairələr Vaşinqtona hökumətin Hizbullahın silahlarını mərhələli şəkildə toplamaq öhdəliyini təsdiqləsə də, prezident Aun ölkə daxilində fərqli siqnallar göndərir. Onun mesajı belədir ki, partiyaya qarşı hərbi addım yalnız geniş siyasi konsensus əldə olunandan sonra mümkündür, bəlkə də ümumiyyətlə mümkün deyil, çünki bu, ölkəni daxildən partlada bilər.

Yəməndəki “Ənsar Allah” hərəkatının husi qüvvələri İsrail ərazisində dörd obyektə dron hücumu həyata keçiriblər. Bu barədə hərəkatın hərbi nümayəndəsi Yəhya Saria husilərə məxsus “Al Masirah” telekanalında açıqlama verib. Onun sözlərinə görə, zərbələr arasında İsrail Baş Qərargahının binası da olub. Hücumlara həmçinin Tel-Əvivdəki Ben Qurion hava limanı, Aşdod dəniz limanı və Tel-Əviv elektrik stansiyası da məruz qalıb. Husi nümayəndəsi bildirib ki, pilotsuz uçuş aparatları ilə həyata keçirilən hücumlar uğurla hədəflərinə çatıb.

İsrail ordusu bu gün işğal olunmuş İordan çayının qərb sahilinin şimalında yerləşən Kufr Qilil kəndinə hücum edərək 10-dan çox fələstinlini saxlayıb, 150-dən artıq evə basqın həyata keçirib. İndiyədək 10-dan çox sakin saxlanılıb, 150-dən artıq ev axtarılıb və kənd qəbiristanlığı dağıdılıb. Ordu ağır texnika ilə kəndə daxil olub və bir sakinə hücum edərək ona bədən xəsarətləri yetirib. Yaralı şəxs səhər saatlarında xəstəxanaya yerləşdirilib.

Tehran nüvə proqramı ilə bağlı ABŞ-la danışıqlardan imtina etməyib, lakin Vaşinqtonun irəli sürdüyü şərtləri qəbuledilməz hesab edir. Bu barədə İranın Ali Milli Təhlükəsizlik Şurasının katibi Əli Laricani bildirib. “ABŞ-la danışıqlar yolu hələ bağlanmayıb. Amma amerikalılar yalnız danışıqlardan yana olduqlarını deyir, masa arxasına əyləşmirlər və əsassız olaraq buna görə İranı ittiham edirlər” – deyə, Laricani “X” sosial şəbəkəsində yazıb.

Məlumata görə, əsgərlər iki ilə yaxın davam edən döyüşlərdən sonra tükənib və “HƏMASı gerilla müharibəsi üslubu ilə məhv etmək mümkün deyil”. Ordunun bəzi komandirləri isə qeyri-adi üsullara əl ataraq, hətta universitet tələbələrinin WhatsApp qruplarında döyüşçü, xüsusən də snayper və sanitar axtardıqlarını elan ediblər.

İsrailin davam edən hücumları və mühasirəsi səbəbindən dərin humanitar böhran yaşanan Qəzza zolağında aclıq səbəbilə ölüm halları artır. Son 24 saat ərzində 3-ü uşaq olmaqla 13 fələstinli aclıq və qidalanma çatışmazlığı səbəbilə həyatını itirib. Bu barədə Qəzzadakı Fələstin Səhiyyə Nazirliyi yazılı açıqlama yayıb. Bildirilib ki, bölgədə uzun müddətdir davam edən ərzaq çatışmazlığı və yardım qıtlığı nəticəsində ölüm halları kritik həddə çatıb. Açıqlamaya görə, 2023-cü il 7 oktyabrdan bu günədək Qəzzada aclıqdan ölənlərin ümumi sayı 361 nəfərə yüksəlib. Onlardan 131-i uşaqlardır.

İsrail ordusu bu gün Yəməndən buraxılan pilotsuz uçuş aparatını (PUA) ölkənin hava məkanına daxil olmadan məhv edib. “Yəmən ərazisindən buraxılan PUA İsrail sərhədlərinə daxil olmadan zərərsizləşdirilib. Tətbiq edilən siyasətə uyğun olaraq heç bir siqnalizasiya işə salınmayıb” - deyə, ordunun bəyanatda qeyd olunub. Bundan əvvəl İsrailin rəsmi yayım qurumu Yəməndən İsrail istiqamətində buraxılan dronun izlənildiyini və ordunun onu məhv etməyə hazırlaşdığını bildirmişdi.

Qəzzadakı Fələstin Səhiyyə Nazirliyi aclıqdan ölənlərlə bağlı son məlumatları özündə əks etdirən yazılı açıqlama yayıb. Açıqlamada bildirilib ki, son bir gündə üçü uşaq olmaqla 9 fələstinli aclıq və qida çatışmazlığı səbəbindən dünyasını dəyişib. 2023-cü ilin oktyabr ayının 7-dən bəri Qəzzada aclıqdan ölənlərin sayı 348-ə çatıb, onların 127-si uşaqlardır. Birləşmiş Millətlər Təşkilatının (BMT) dəstəklədiyi İnteqrasiya edilmiş Qida Təhlükəsizliyi Faza Təsnifatı (IPC) 22 avqust tarixində Qəzzada aclıq elan etdikdən sonra 12-si uşaq olmaqla 70 nəfər aclıq və qida çatışmazlığından həyatını itirib. IPC-nin son hesabatında qeyd olunur ki, 15 avqust 2025-ci il tarixinə Qəzza şəhərində aclıq “fəlakətli səviyyə” kimi təsnif edilən 5-ci səviyyədədir. Hesabatda vurğulanır ki, 22 aylıq amansız münaqişə nəticəsində Qəzza zolağında yarım milyondan çox insan aclıq, yoxsulluq və ölümə səbəb olan dəhşətli şəraitlə üzləşib.

İsrail ordusu, Qəzza zolağının mərkəzində yerləşən Deyr əl-Bələh şəhərindəki Aksa Şəhidləri Xəstəxanasını 7 oktyabr 2023-cü ildən bu yana artıq 14-cü dəfə hədəfə aldığı bildirilib. Qəzzadakı Hökumətin Media Ofisinin yaydığı açıqlamaya görə, İsrailə məxsus döyüş təyyarələri Aksa Şəhidləri Xəstəxanasının ətrafındakı divar içərisində yerləşən və məcburi köçkün fələstinlilərin sığındığı çadırlara və yaxınlıqdakı poliklinikalara hava zərbələri endirib. Açıqlamada, daha öncə 13 dəfə hədəf alınan xəstəxananın bu hücumla birlikdə İsrail ordusu tərəfindən 14-cü dəfə vurulduğu vurğulanıb.

İsrail ordusunun bu səhər saatlarında Qəzza zolağının müxtəlif bölgələrinə həyata keçirdiyi hava hücumları nəticəsində, aralarında uşaqlar və məcburi köçkün fələstinlilərin də olduğu 19 nəfər həlak olub. Xəstəxana mənbələrinin və hadisə şahidlərinin verdiyi məlumata görə, Qəzza şəhərinin qərbində yerləşən Şati Qaçqınlar Düşərgəsi ətrafında bir evə hava hücumu təşkil olunub. Hücum nəticəsində hamilə qadın, iki uşaq daxil olmaqla 3 nəfər həlak olub. Şati düşərgəsində məcburi köçkünlərin yaşadığı bir çadır da bombalanıb, nəticədə 1 fələstinli həyatını itirib. Eyni düşərgənin Kavka döngəsi yaxınlığında yerləşən bir evə edilən hava hücumunda isə çox sayda fələstinli yaralanıb.

İsrail ordusu HƏMAS liderlərini, o cümlədən digər ölkələrdəki fiqurlarını da hədəfə alaraq öldürməyə hazırdır. Bunu İsrail ordusunun Baş Qərargah rəisi Eyal Zamir açıqlayıb. “İsrail Müdafiə Qüvvələri bütün istiqamətlərdə və istənilən vaxt təşəbbüsü və əməliyyat üstünlüyünü qoruyaraq hücum əməliyyatları aparır. Dünən Qəzzada HƏMAS-ın yüksək rütbəli liderlərindən biri – Əbu Ubeydəyə zərbə endirdik. HƏMAS rəhbərliyinin böyük hissəsi artıq aradan götürülüb. Əməliyyatlarımız hələ başa çatmayıb, qalan rəhbərlərin çoxu xaricdədir və biz onlara da çatacağıq” – deyə Zamir bildirib.

İsrail ordusu Qəzza zolağında HƏMAS-ın hərbi qolunun rəsmi nümayəndəsi Əbu Ubeydəni öldürüb. Məlumatı İsrailin müdafiə naziri İsrael Kats təsdiqləyib. “HƏMAS-ın sözçüsü Əbu Ubeydə Qəzzada məhv edildi. O, artıq İran, Qəzza, Livan və Yəməndən olan ‘şər oxu’nun digər aradan qaldırılmış üzvləri ilə cəhənnəmdə ‘görüşməyə’ göndərildi” - deyə, o "X" sosial şəbəkəsində yazıb. Nazir İsrail ordusunun əməliyyatlarını yüksək qiymətləndirərək, HƏMAS liderlərinin zərərsizləşdirilməsinin davam edəcəyini bildirib: “Qəzzadakı kampaniya intensivləşdikcə, onun (Əbu Ubeydənin – red.) cinayətkar tərəfdaşları da tezliklə ona qoşulacaqlar.”

İsrailin baş naziri Benyamin Netanyahu açıqlayıb ki, ordusu HƏMAS-ın silahlı qanadı olan “İzzəddin əl-Qəssam Briqadaları”nın sözçüsü Əbu Ubeydəni hədəf alan hücum həyata keçirib. Netanyahu bu barədə bazar günü etdiyi çıxışında danışıb. “Ümid edirəm ki, o artıq aramızda deyil” - deyə, Netanyahu bildirib. Lakin HƏMAS hələlik Əbu Ubeydənin öldüyü barədə məlumatı təsdiqləməyib. Qeyd edək ki, Fələstin Səhiyyə Nazirliyinin açıqlamasına görə, son 24 saatda İsrailin Qəzza zolağına hücumları nəticəsində 88 nəfər həlak olub, 421 nəfər yaralanıb. Bununla da müharibənin əvvəlindən ölənlərin ümumi sayı 63 min 459 nəfərə yüksəlib. Nazirlik əlavə edib ki, İsrail ordusunun martın 18-dən bəri atəşkəsi pozaraq davam etdirdiyi hücumlarda indiyədək 11 min 328 nəfər ölüb, 48 min 215 nəfər yaralanıb. Son 24 saatda humanitar yardım gözləyənlərin hədəfə alındığı zərbələrdə isə 30 nəfər həlak olub, 166 nəfər yaralanıb.

HƏMAS İsrailin Qəzzanın qərbində Əl-Rimal məhəlləsində bir binaya endirdiyi hava hücumunda 7 fələstinlinin şəhid olması və bir neçə nəfərin yaralanması ilə bağlı yazılı açıqlama verib.

İsrail ordusunun gün ərzində Qəzza zolağının çoxsaylı bölgələrində mülki əhalini hədəf alan hücumları nəticəsində bu gün 58 fələstinli həyatını itirib. AzerVoice xəbər verir ki, xəstəxana mənbələri və şahidlərin bildirdiyinə görə, İsrailin Qəzza şəhərinə planlı işğalının bir hissəsi olaraq Qəzza zolağının şimal, mərkəzi və cənub hissələrində çoxsaylı bölgələrdə evlərə, mülki insanların toplaşdığı yerlərə və yardım istəyən insanlara hücumlar həyata keçirilib.

İsveçin paytaxtı Stokholmda yüzlərlə insan İsrailin Qəzzadakı aclıq siyasətini və jurnalistləri hədəf almasına etiraz edib. AzerVoice xəbər verir ki, çox sayda vətəndaş cəmiyyəti təşkilatının çağırışı ilə Odenplan Meydanında toplanan yüzlərlə insan, 25 avqustda İsrailin Qəzza zolağının cənubundakı Xan Yunusda yerləşən Nasser Xəstəxanasına etdiyi hücumlar nəticəsində həlak olan jurnalistlərin simvolik tabutlarını və fotoşəkillərini daşıyıb.

İsrail ordusu gecə yarısından sonra Suriyanın cənubundakı Quneytra əyalətində bir kəndə hücum edib. AzerVoice xəbər verir ki, bu barədə Suriya dövlət televiziyası olan əl-İxbariyyədə məlumat verilib. Xəbərdə “Gecə yarısından sonra İsrail ordusu kənddə iki evdə axtarış edib” ifadəsi işlədilib.

Avropa İttifaqı (Aİ) İsrailin Qəzza zolağında genişmiqyaslı hərbi əməliyyata başlaması qərarını şərh etməyə hazır olmadığını açıqlayıb. Bu barədə Aİ-nin ali diplomatik nümayəndəsi Kaya Kallas Kopenhagendə keçirilən Aİ-nin qeyri-rəsmi nazirlər görüşünün ilk gününün yekunlarına dair mətbuat konfransında danışıb.