Birləşmiş Millətlər Təşkilatı İranı Yəməndə vəziyyətin yaxşılaşdırılması və sülh prosesinin irəlilədilməsi istiqamətində BMT-nin rolunu dəstəkləməyə çağırıb. BMT-nin Yəməndə xüsusi elçisi Hans Grundberg bazar ertəsi günü Müsqatda İran Xarici İşlər Naziri Abbas Araqçi ilə görüş keçirib. Grundberg Yəmənlə bağlı vəziyyətin gedişi barədə hesabat təqdim edərək İranın BMT-nin təşəbbüslərinə və sülh prosesinə dəstəyinin vacibliyini vurğulayıb.

Almaniya Xarici İşlər Naziri Yohan Vadeful Cenevrədə aparılan görüşlərdə ABŞ-ın Rusiya-Ukrayna müharibəsini sona çatdırmaq üçün hazırladığı 28 maddəlik “sülh planı”nda Avropa və NATO ilə bağlı məsələlərin çıxarıldığını açıqlayıb. Vadeful Deutschlandfunk radiosuna verdiyi açıqlamada, Avropanın və Ukraynanın iştirakının vacib olduğunu, ilk addımın atıldığını və Avropadakı maraqların qorunduğunu vurğulayıb.

İranın Ali Milli Təhlükəsizlik Şurasının katibi Əli Laricanı bazar ertəsi, 24 noyabr tarixində “dost və qardaş” Pakistan ölkəsinə rəsmi səfər edəcək. Bu barədə o, X sosial şəbəkəsində paylaşım edib. Laricanı bildirib ki, İran xalqı heç vaxt Pakistan xalqının İrana dəstəyini unutmur. O, xüsusilə İsrail rejimi və ABŞ-ın iyun ayında İrana qarşı tətbiq etdiyi 12 günlük işğalçı müharibə zamanı Pakistanın göstərdiyi dəstəyi xatırladıb.

Kanadanın Baş naziri Mark Karni bildirib ki, ABŞ beynəlxalq arenada öz rolunu şişirtməməlidir və bir çox məsələlər ABŞ iştirakına ehtiyac olmadan həll edilə bilər. Karni, həftəsonu Cənubi Afrikanın Yohannesburq şəhərində keçirilən G20 sammiti çərçivəsində jurnalistlərə açıqlamasında, iqtisadi “ağırlıq mərkəzinin” də artıq Amerikadan uzaqlaşdığını qeyd edib. Sammitə ABŞ qatılmayıb. Prezident Donald Tramp, ölkənin ağ fermerlərə qarşı soyqırım həyata keçirdiyini iddia edərək, bu səbəbi olmadan sammitdə iştirak etmədiyini açıqlayıb. ABŞ həmçinin, toplantı sonrası yalnız sədrin xülasəsinin yayıla biləcəyini iddia edib, çünki ölkə sammitdə iştirak etməyib. Buna baxmayaraq, G20 bazar günü bir deklarasiya yayımlayıb.

Ağ Ev Ukraynalı rəsmilərin, Rusiya-Ukrayna müharibəsinin sona çatdırılması üçün İsveçrənin Cenevrə şəhərində keçirilən barış planı görüşmələri nəticəsində hazırlanmış layihənin milli maraqları əks etdirdiyini açıqlayıb. Açıqlamada qeyd olunur ki, ABŞ Xarici İşlər Nazirliyi, Prezident Donald Trampın Yaxın Şərq üzrə xüsusi nümayəndəsiStiven Uitkoff, Trampın qayını Jared Kushner və ABŞ Senatoru Marko Rubio Ukraynalı heyətlə barış anlaşması layihəsinin son variantını nəzərdən keçiriblər.

Türkiyə Prezidenti Rəcəb Tayyib Ərdoğan bu gün Beştepedə Koreya Respublikasının Prezidenti Li Çzyo Myungu rəsmi mərasimlə qarşılayacaq. Qarşılanma mərasimindən sonra iki lider arasında təkbətək və nümayəndə heyətləri arasında görüşlərin keçirilməsi gözlənilir. Ziyarət çərçivəsində Türkiyə və Koreya Respublikası arasında strateji tərəfdaşlığın gələcək istiqamətləri müzakirə olunacaq. Danışıqların əsas gündəmini ikitərəfli siyasi münasibətlər, müdafiə sənayesi sahəsində yeni layihələr, nəqliyyat və infrastruktur əməkdaşlığı, həmçinin yüksək texnologiya və innovasiya sahələrində qarşılıqlı investisiya imkanları təşkil edəcək.

İran prezidenti Məsud Pezeşkian bildirib ki, ölkənin BRİKS, Şanxay Əməkdaşlıq Təşkilatı (SCO) və Avrasiya İqtisadi İttifaqında (EAEU) fəal iştirakı geniş regional bazarlar da daxil olmaqla əhəmiyyətli iqtisadi imkanlar yaradır. Tehranda keçirilən “Dayanıqlılıq, İnnovasiya, İnkişaf” adlı illik kapital bazarı konfransında çıxış edən Pezeşkian diplomatik əlaqələrin qonşu ölkələrlə konstruktiv münasibətləri gücləndirdiyini vurğulayıb. O, qeyd edib ki, bu proses günbəgün möhkəmlənir və İran iqtisadi fəaliyyəti asanlaşdıraraq investorları dəstəkləməyə çalışır.

Cənubi Koreya ABŞ ilə yaşadığı siyasi anlaşmazlıqlar səbəbindən Venesuelanın sərhəd bölgələri olan Zulia, Tachira, Apure və Sucre əyalətlərinə səyahət qadağası tətbiq edib. Cənubi Koreya Xarici İşlər Nazirliyi Venesuela üçün ən yüksək səviyyəli, 4-cü səviyyə səyahət xəbərdarlığını elan edib. Ölkənin digər bölgələri üçün isə 3-cü səviyyəli səyahət xəbərdarlığı verilib və vətəndaşlara həmin bölgələri tərk etmələri tövsiyə olunub. Açıqlamada qeyd olunub ki, qadağa tətbiq olunan ərazilərə xüsusi icazə olmadan gedən və ya qalan şəxslərə cinayət məsuliyyəti tətbiq oluna bilər.

Sudanın mərkəzində yerləşən Kordofan bölgəsində aclıq və kəskin qida çatışmazlığı səbəbindən bir ay ərzində 23 uşaq həyatını itirib. Sudan Həkimlər Şəbəkəsi ölümlərin 20 oktyabr–20 noyabr tarixləri arasında mühasirədə olan Kadugli şəhəri və Dilling qəsəbəsində qeydə alındığını bildirib. Ölkədə 30 aydan çoxdur davam edən və ordunun Sürətli Dəstək Qüvvələri (RSF) ilə toqquşması nəticəsində yaranan müharibə humanitar vəziyyəti kəskin şəkildə pisləşdirib. BMT-nin məlumatına görə, müharibə 40 min insanın ölümünə səbəb olub, 14 milyondan çox insan evlərini tərk etməyə məcbur qalıb və ölkənin geniş hissələrində aclıq hökm sürür.

Fransanın sabiq prezidenti Nikola Sarkozi həbsdə keçirdiyi 20 gün barədə kitab yazıb. O, öz rəsmi “X” hesabında bu barədə paylaşım edib. Sabiq Fransa lideri kitabında həbsxanadakı səs-küydən gileylənib. Bundan başqa, Sarkozi həbs həyatı ilə səhranı müqayisə edib, çünki onun fikrincə, belə yerlərdə “həyat daha da möhkəmlənir”.

Pakistanın Pəncab əyalətinə bağlı Faysalabad şəhərində fəaliyyət göstərən yapışqan (tutkal) fabrikində qaz sızması nəticəsində baş verən partlayışda 15 nəfər həyatını itirib, çox sayda insan yaralanıb.

İran İslam Respublikası Xarici İşlər Nazirliyi, Beynəlxalq Atom Enerjisi Agentliyinin (IAEA) İdarə Heyətinin (BoG) İranın sülh məqsədli nüvə proqramı ilə bağlı qəbul etdiyi qətnaməni qanunsuz və əsassız adlandırıb. Nazirliyin bəyanatında qətnamənin ABŞ, Almaniya, Fransa və Böyük Britaniyanın təzyiqi ilə qəbul edildiyi qeyd olunub. Qətnamə 20 noyabr 2025-ci il tarixində üç Avropa ölkəsi (Fransa, Böyük Britaniya, Almaniya) tərəfindən ABŞ-ın dəstəyi ilə irəli sürülüb və 19 səs lehinə, 12 bitərəf və 3 əleyhinə olmaqla qəbul edilib.