İranın Xarici İşlər Naziri Abbas Əraqçi bildirib ki, ABŞ-ın mövqeyi səbəbindən İranın nüvə proqramı ilə bağlı tarazlı və ədalətli danışıqlar prosesi hazırda mümkün deyil. Cümə axşamı axşamı verdiyi açıqlamalarda Əraqçi Fransaya səfərinin məqsədləri və nəticələri barədə danışıb. O deyib ki, Parisə səfər İranın Fransa ilə ikitərəfli münasibətlər, regional məsələlər, nüvə mövzuları və Ukrayna kimi Avropa məsələləri də daxil olmaqla müxtəlif sahələrdə apardığı məsləhətləşmə və fikir mübadiləsinin davamıdır.

Çinin Honq Konq Xüsusi İnzibati Regionunun Tai Po bölgəsində 8 binadan ibarət yaşayış kompleksində baş verən yanğında həlak olanların sayının 94-ə yüksəldiyi bildirilib. Honq Konq Yanğınsöndürmə Xidmətinin məlumatına görə, yanğında indiyədək biri yanğınsöndürən olmaqla 94 nəfər həyatını itirib, 11-i yanğınsöndürən olmaqla 76 nəfər yaralanıb.

ABŞ Prezidenti Donald Tramp “ABŞ sisteminin tam bərpa oluna bilməsi üçün üçüncü dünya ölkələrindən gələn bütün miqrasiyanı daimi olaraq dayandıracağam” açıqlamasını verib. Tramp, ABŞ mənşəli Truth Social hesabında miqrasiya siyasəti ilə bağlı açıqlama yayımlayıb. ABŞ-ın texnoloji baxımdan inkişaf etmiş olduğunu, lakin miqrasiya siyasətinin bu nailiyyətlərə zərər verdiyini iddia edən Tramp, “ABŞ sisteminin tamamilə yaxşılaşması üçün üçüncü dünya ölkələrindən gələn bütün miqrasiyanı daimi olaraq dayandıracağam” ifadəsini işlədib.

Birləşmiş Millətlər Təşkilatı (BMT) Sudanda ordu ilə Sürətli Dəstək Qüvvələri (RSF) arasında üç ilə yaxın davam edən gərgin vəziyyət nəticəsində 21,2 milyon insanın qida təminatı baxımından çətinliklərlə üzləşdiyini açıqlayıb. BMT bildirib ki, xüsusilə iki bölgədə ciddi qida çatışmazlığı müşahidə olunub. Ancaq vəziyyətin nisbətən sabit olduğu bölgələrdə Dünya Qida Proqramı (WFP) yardımları genişləndirilib və insanların ehtiyacları müəyyən qədər ödənilib.

Banqladeş məhkəməsi sabiq baş nazir Şeyx Hasinaya korrupsiya ittihamı ilə 21 il həbs cəzası verib. Qeyd edək ki, bir həftə əvvəl o, keçən il baş verən tələbə qiyamını qırmaq əmri verdiyi üçün insanlığa qarşı cinayətlərdə təqsirli bilinərək ölüm hökmünə məhkum edilmişdi. 78 yaşlı Hasina hazırda Hindistanda yaşayır və ölkəyə qayıtmaqla bağlı məhkəmə qərarını yerinə yetirməyib. Məhkəmə hakim Abdullah Əl Mamun qərarında, Hasinanın “ictimai torpaqları şəxsi mülkiyyət kimi istifadə etməsi və dövlət resurslarından özünə və yaxınlarına fayda götürmək üçün rəsmi prosedurları manipulyasiya etməsi”ni vurğulayıb.

BMT-nin Ekonomik və Sosial İşlər Departamentinin “2025 Dünya Şəhərləşmə Gözləntiləri” hesabatına görə, İndoneziyanın paytaxtı Cakarta 42 milyon əhalisi ilə Tokionu geridə qoyaraq dünyanın ən çox əhalisi olan şəhərinə çevrilib. Siyahıda Banqladeşin paytaxtı Dəkkə 37 milyonla ikinci, Tokio isə 33 milyonla üçüncü yerdə qərarlaşıb. Hesabatda bildirilir ki, 1950-ci ildə dünya əhalisinin yalnız 20 faizi şəhərlərdə yaşayırdısa, bu gün bu göstərici 50 faizə yüksəlib. 2050-yə qədər əhali artımının üçdə ikisinin şəhərlərdə baş verəcəyi proqnozlaşdırılır.

Avstraliyanın xarici işlər naziri Penni Vonq cümə axşamı bildirib ki, ölkəsi İranın “İnqilab Keşikçiləri Korpusunu (SEPAH)” terrorizmi dəstəkləyən qurumlar siyahısına daxil edib. Bu qərar ölkənin kəşfiyyat xidmətinin SEPAH-ın Avstraliyada yəhudilərə qarşı hücumlar planlaşdırdığına dair gəldiyi nəticədən sonra verilib. Avqust ayında Avstraliya hökuməti İranı Sidney və Melburn şəhərlərində törədilən iki antisemit və qəsdən yandırma hücumunu təşkil etməkdə ittiham etmişdi. Rəsmi Kanberra həmin vaxt bu hücumları ölkənin milli təhlükəsizliyinə təhdid kimi qiymətləndirmişdi.

İranın Xarici İşlər naziri Abbas Əraqçi bildirib ki, ölkənin nüvə obyektlərinin yoxlanılması üçün yeni çərçivə və protokolların yaradılması zəruridir. Əraqçi Fransada verdiyi müsahibədə bildirib ki, MAQATE-nin son qərarında İranın bombalanmış nüvə obyektlərinə yaxınlaşma riskləri nəzərə alınmayıb. Onun sözlərinə görə, zədələnmiş obyektlərin yoxlanılması hazırda təhlükəlidir, çünki amerikalıların yeni hücum riski, partlamamış sursat və radioaktiv və kimyəvi çirklənmə təhlükəsi mövcuddur.

İranın Xarici İşlər naziri Abbas Əraqçi bildirib ki, İran və ABŞ arasında hazırda heç bir danışıqlar aparılmır və Vaşinqton real, ədalətli dialoq üçün zəruri iradəni nümayiş etdirməyib. France 24 kanalına verdiyi müsahibədə Əraqçi qeyd edib ki, ABŞ Prezidentinin xüsusi elçisi Stiv Vitkofla əlaqə kanalları mövcud olsa da, hazırda heç bir danışıqlar prosesi başlamayıb. O əlavə edib ki, müxtəlif vasitəçilər mesajları ötürməyə davam etsələr də, ABŞ tərəfi real danışıqlara hazır deyil.

Perunun keçmiş dövlət başçısı Martin Viskarra rüşvət alma ittihamı ilə 14 il müddətinə azadlıqdan məhrum edilib. O, eyni zamanda 9 il ərzində dövlət qulluğunda çalışmaqdan məhrum olunub. Paytaxt Lima şəhərində keçirilən məhkəmə prosesində Viskarranın 2011–2014-cü illərdə Moqueqa bölgəsinin rəhbəri olduğu dövrdə bəzi iş adamlarından onları dövlət tenderlərində üstün tutmaq üçün pul aldığı iddia olunub.

İndoneziyanın Sumatra adası sahillərində 6,6 bal gücündə zəlzələ baş verdiyi bildirilib. ABŞ Geoloji Tədqiqatlar Mərkəzinin məlumatına görə, İndoneziyada 6,6 gücündə zəlzələ qeydə alınıb. Zəlzələnin Sumatra adası açıqlarında meydana gəldiyi qeyd olunub.

Livan və Cənubi Kipr Rum İdarəsi (GKRY) arasında dəniz səlahiyyət sahələrinin sərhədlərinin müəyyənləşdirilməsi barədə anlaşma imzalanıb. İmzalanma mərasimi başkənd Beyrutdakı Baabda Sarayında keçirilib. Tədbirdə Livan Prezidenti Cozef Aun, GKRY lideri Nikos Hristodulidis və Livan Bayındırlıq və Nəqliyyat Naziri Fayiz Rasamini iştirak ediblər. Mərasimdən sonra birgə mətbuat konfransında çıxış edən Aun, anlaşmanın imzalanmasından məmnunluğunu ifadə edib. O bildirib ki, bu razılaşma sayəsində Livan və Cənubi Kipr Rum İdarəsi dəniz resurslarını kəşf etmək və bu sahədə ortaq əməkdaşlığı genişləndirmək imkanına sahib olacaq.