BAKI, AzerVoice, Nailə Babazadə

BMT-nin Ekonomik və Sosial İşlər Departamentinin “2025 Dünya Şəhərləşmə Gözləntiləri” hesabatına görə, İndoneziyanın paytaxtı Cakarta 42 milyon əhalisi ilə Tokionu geridə qoyaraq dünyanın ən çox əhalisi olan şəhərinə çevrilib. Siyahıda Banqladeşin paytaxtı Dəkkə 37 milyonla ikinci, Tokio isə 33 milyonla üçüncü yerdə qərarlaşıb.

AzerVoice xəbər verir ki, hesabatda bildirilir ki, 1950-ci ildə dünya əhalisinin yalnız 20 faizi şəhərlərdə yaşayırdısa, bu gün bu göstərici 50 faizə yüksəlib. 2050-yə qədər əhali artımının üçdə ikisinin şəhərlərdə baş verəcəyi proqnozlaşdırılır.

Böyük şəhərlərin sayı 1975-ci ildə 8 idisə, 2025-ci ildə bu rəqəm 33-ə çatıb. Dünyanın ən sıx əhalili 10 şəhərindən 9-u Asiyada yerləşir.

Hesabatda həmçinin Tokionun pandemiya dövründə yavaşlayan əhali artımının iş və təhsil imkanları səbəbilə yenidən artmağa başladığı qeyd edilib. BMT rəsmisi Li Junhua şəhərləşmənin düzgün idarə edildiyi təqdirdə iqtisadi inkişaf və sosial bərabərlik üçün böyük imkanlar yaratdığını bildirib.