BAKI,VOA,Yusif Şərifzadə

Beynəlxalq Valyuta Fondunun strategiya məsələləri üzrə yeni direktoru Kristian Mumssen hökumətləri qlobal iqtisadi qeyri-müəyyənlik şəraitində qiymət sabitliyinin qorunmasına üstünlük verməyə çağırıb.

VOA xəbər verir ki, Kristian Mumssen bu fikirləri Atlantik Şurasının təşkil etdiyi tədbirdə səsləndirib.

Onun sözlərinə görə, son illərdə dünya iqtisadiyyatı ardıcıl şəkildə yeni sınaqlarla üzləşib. O, koronavirus pandemiyasını, yaşayış xərclərinin artmasını, ticarət gərginliklərini, Ukrayna və Yaxın Şərqdəki müharibələri bu prosesə təsir göstərən əsas amillər kimi göstərib.

Mumssen bildirib ki, süni intellekt və rəqəmsal maliyyə texnologiyaları gözləniləndən daha sürətlə inkişaf edir. Eyni zamanda, İkinci Dünya müharibəsindən sonra formalaşmış beynəlxalq nizamın daha parçalanmış və çoxqütblü sistemlə əvəz olunduğunu vurğulayıb.

Onun fikrincə, dünya iqtisadiyyatı bütün bu çətinliklərə baxmayaraq dayanıqlılıq nümayiş etdirib. Lakin baş verən dəyişikliklərin miqyası yüksək qeyri-müəyyənlik yaradır və gözlənilməz hadisələrin baş verməsi ehtimalını artırır.

Kristian Mumssen qeyd edib ki, hökumətlər sağlam dövlət maliyyəsinə, büdcə kəsirinə, dövlət borcuna, inflyasiyaya, məşğulluğa və iqtisadi artıma xüsusi diqqət yetirməlidirlər.

O əlavə edib ki, təchizat zəncirində baş verən tez-tez pozuntular qiymət sabitliyi üçün əsas risklərdən biri olaraq qalır.