BAKI,VOA, Nailə Babazadə

Fransa Prezidenti Emmanuel Makron çərşənbə axşamı günü "X" sosial şəbəkəsində etdiyi paylaşımda Fransa vətəndaşları Sesil Koler və Jak Parisin İranda üç yarım illik həbsdən sonra "azad olduqlarını və Fransaya doğru yola düşdüklərini" bildirib.

VOA xəbər verir ki, Makron onların azad edilməsində Omanın vasitəçilik etdiyini əlavə edib. Cütlük 2022-ci ildən bəri casusluq ittihamı ilə İranda saxlanılırdı, Fransa isə bu ittihamların əsassız olduğunu bəyan etmişdi. Onlar noyabr ayında bədnam Evin həbsxanasından azad edilmiş və o vaxtdan bəri Fransa səfirliyində qalırdılar.

Fransanın xarici işlər naziri Jan-Noel Barro cütlüklə danışdığını və onların tezliklə vətənlərinə, yaxınlarının yanına qayıdacaqları üçün böyük sevinc hissi keçirdiklərini bildirib. Nazirlik Barronun həftəsonu iranlı həmkarı Abbas Araqçı ilə danışıqlar apardığını qeyd edib. Milli Assambleyada deputatlar bu xəbəri ayaqüstü alqışlarla qarşılayıblar.

İranın rəsmi xəbər agentliyi IRNA cütlüyün azad olunmasını təsdiqləyərək bildirib ki, bu, Tehran və Paris arasında əldə olunmuş razılaşmanın nəticəsidir. Razılaşmaya əsasən, Fransa öz növbəsində Lion şəhərində yaşayan iranlı tələbə Məhdiə İsfəndiyarini azad edəcək. İsfəndiyari ötən il İsrail əleyhinə sosial media paylaşımlarına görə həbs edilmişdi. IRNA-nın məlumatına görə, razılaşmanın bir hissəsi kimi Fransa həmçinin Beynəlxalq Ədalət Məhkəməsində İrana qarşı verdiyi şikayəti geri götürəcək.

Fransız cütlüyün azad edilməsi ABŞ Prezidenti Donald Trampın İranın Hörmüz boğazını açmaq üçün son dəqiqə razılaşmasına gəlməyəcəyi təqdirdə "bu gecə bütöv bir sivilizasiyanın məhv olacağı" ilə hədələdiyi bir vaxta təsadüf edib. Ötən cümə axşamı Fransanın "CMA CGM" gəmiçilik qrupuna məxsus konteyner gəmisinin Hörmüz boğazından keçməsi İranın Fransanı düşmən ölkə hesab etmədiyinin göstəricisi kimi qiymətləndirilir.