BAKI,VOA, Fərid Mikayılov

İran və ABŞ arasında davam edən gərginliyin dayandırılması istiqamətində yeni diplomatik təşəbbüs irəli sürülüb.

VOA xəbər verir ki, Pakistan tərəfindən hazırlanmış və tərəflərə təqdim olunan plan dərhal atəşkəsin elan edilməsini və sonradan geniş razılaşmanın əldə olunmasını nəzərdə tutur.

Məlumata görə, iki mərhələli yanaşmanı ehtiva edən təklifə əsasən, ilkin mərhələdə dərhal atəşkəs qüvvəyə minməli, daha sonra isə 15–20 gün ərzində hərtərəfli razılaşma üzərində danışıqlar aparılmalıdır. Planın eyni zamanda Hörmüz boğazının yenidən açılmasını təmin etməsi nəzərdə tutulur.

Bildirilir ki, təklif Pakistan vasitəsilə tərəflərə təqdim olunub və ilkin razılaşmanın elektron formada memorandum kimi rəsmiləşdirilməsi planlaşdırılır. Danışıqlarda Pakistanın əsas vasitəçi kimi çıxış etdiyi qeyd olunur.

Mənbələrə əsasən, Pakistan ordusunun başçısı Asim Munir ABŞ-ın vitse-prezidenti JD Vens, xüsusi nümayəndə Stiv Uitkoff və İranın xarici işlər naziri Abbas Əraqçi ilə intensiv təmaslar aparıb.

Qeyd olunur ki, müzakirə olunan razılaşma çərçivəsində İranın nüvə proqramı ilə bağlı öhdəliklər götürməsi, əvəzində isə sanksiyaların yumşaldılması və dondurulmuş aktivlərin azad edilməsi nəzərdə tutulur.

Bununla belə, İran tərəfinin hələlik təklifə rəsmi cavab vermədiyi bildirilir.

Son diplomatik təşəbbüs Hörmüz boğazında gərginliyin artması və qlobal enerji bazarlarına təsirlə bağlı narahatlıqlar fonunda gündəmə gəlib.