BAKI, VOA, Nailə Babazadə

İtaliya Müdafiə Nazirliyinin cümə axşamı yaydığı məlumata görə, İraq Kürdüstanında yerləşən İtaliya hərbi bazası gecə saatlarında raket hücumuna məruz qalıb.

VOA xəbər verir ki, nazirlik rəsmi "X" platformasında verdiyi açıqlamada raketin Ərbildəki bazaya düşdüyünü, lakin İtaliya hərbi heyəti arasında hər hansı tələfat və ya yaralanma halının qeydə alınmadığını bildirib. Heyət üzvlərinin hamısının vəziyyətinin yaxşı olduğu və hadisə ilə bağlı Müdafiə naziri Quido Krosettonun yüksək rütbəli hərbi komandirlərlə daimi təmasda olduğu diqqətə çatdırılıb.

İtaliyanın xarici işlər naziri Antonio Tajani də hadisə ilə bağlı verdiyi mesajda hərbi personelin hücum zamanı sığınacaqlara yerləşdiyini, bütün əsgərlərin sağ-salamat olduğunu təsdiqləyib. Hadisənin regional gərginliyin artdığı bir dövrə təsadüf etməsi beynəlxalq koalisiya qüvvələrinin təhlükəsizliyi ilə bağlı narahatlıqları yenidən gündəmə gətirib. Nazirlik İtaliya hərbçilərinin hadisədən sonra müdafiə tədbirlərini gücləndirdiyini və bölgədəki vəziyyəti yaxından izlədiklərini bəyan edib.

Qeyd edək ki, İtaliyanın Ərbildə təxminən 300 nəfərlik hərbi kontingenti fəaliyyət göstərir. Müdafiə Nazirliyinin rəsmi internet səhifəsində yer alan məlumata görə, bu hərbi heyət kürd təhlükəsizlik qüvvələrinin təlimatlandırılması və peşəkar hazırlığının artırılması missiyasını həyata keçirir. İtaliya əsgərləri illərdir bölgədə terrorla mübarizə və sabitliyin təmin edilməsi istiqamətində beynəlxalq səylərin tərkib hissəsi kimi xidmət edirlər.