BAKI, VOA, Nailə Babazadə

Birləşmiş Millətlər Təşkilatının (BMT) Qida Hüququ üzrə xüsusi məruzəçisi Maykl Faxri, ABŞ və İsrailin İrana qarşı həyata keçirdiyi hərbi əməliyyatların beynəlxalq hüquq normalarına zidd olduğunu və bu vəziyyətin həm bölgəni, həm də bütün dünyanı qeyri-sabitlik riski ilə üz-üzə qoyduğunu bəyan edib.

VOA xəbər verir ki, altı illik fəaliyyət müddəti başa çatmaqda olan Faxri, Anadolu Agentliyinə verdiyi müsahibədə ABŞ və İsrailin addımlarının açıq şəkildə qanunsuz olduğunu və bu gərginliyin İranda, eləcə də ümumilikdə regionda daha çox aclıq, məcburi köçkünlük və qorxu mühiti yaradacağını vurğulayıb. İsrailin işğalçılıq siyasətinin Suriya və Livana doğru genişləndiyini, Qəzza, İordan çayının qərb sahili və Şərqi Qüdsdə zorakılığın davam etdiyini xatırladan məruzəçi, bu regional müharibədən ən çox uşaqların, qadınların və yaşlıların əziyyət çəkdiyini qeyd edib.

Yaxın həftələrdə əzabların daha da artacağını bildirən Faxri, qida qiymətlərinin həm artan neft xərcləri, həm də nəqliyyat marşrutlarındakı fasilələr səbəbindən kəskin bahalaşacağını proqnozlaşdırıb. O, qida şirkətlərini siyasi xaosdan istifadə edərək süni qiymət artımına yol verməkdə ittiham edərək, qlobal miqyasda hökumətlərin humanitar yardım büdcələrini kəsib vəsaitləri hərbi xərclərə yönəltdiyini diqqətə çatdırıb. Vəzifə müddəti ərzində qarşılaşdığı ən ağır hadisələrə toxunan Faxri, Qəzzada müasir tarixin ən sürətli aclıq kampaniyasının və Sudandakı görünməmiş qıtlığın şahidi olduqlarını bildirib. Məruzəçi sözlərini beynəlxalq sistemə qarşı sərt tənqidlərlə yekunlaşdıraraq, BMT-nin və digər beynəlxalq qurumların bu cür faciələr qarşısında çevik və təsirli reaksiya verməkdə "bərbad" dərəcədə aciz qaldığını vurğulayıb.