BAKI, VOA, Nailə Babazadə

Pakistanın Baş naziri Şahbaz Şərif cümə günü bəyan edib ki, ölkəsinin silahlı qüvvələri qonşu Əfqanıstana edilən hava zərbələrindən sonra hər hansı bir təcavüzkarı "əzmək" iqtidarındadır.

VOA xəbər verir ki, Şərif "X" platformasındakı paylaşımında bildirib: "Bizim qüvvələrimiz hər hansı təcavüzkar ambisiyaları darmadağın etmək üçün tam qüdrətə sahibdir. Bütün xalq Pakistan Silahlı Qüvvələri ilə çiyin-çiyinə dayanıb".

Əfqanıstan hökuməti cümə axşamı Pakistanın bir neçə gün əvvəl onların ərazisinə endirdiyi hava zərbələrinə cavab olaraq sərhəd məntəqələrinə hücum təşkil etdiyini açıqlamışdı. Kabil tərəfi bu hücum zamanı bir neçə Pakistan əsgərinin öldürüldüyünü və əsir götürüldüyünü iddia edir.

Buna cavab olaraq Pakistan hökuməti cümə günü Əfqanıstanın sərhəddəki hərbi obyektlərə hücumundan sonra Kabil və Qəndəhar şəhərlərinə hava zərbələri endirdiyini təsdiqləyib. Pakistanın müdafiə naziri Xvaca Asif Əfqanıstan hökumətinə qarşı "açıq müharibə" elan edərək deyib: "Səbrimiz tükəndi. İndi bizim və sizin aranızda açıq müharibə başlayıb".

Rusiya Prezidentinin Əfqanıstan üzrə xüsusi nümayəndəsi, Xarici İşlər Nazirinin müşaviri Zamir Kabulov tərəfləri qarşılıqlı hücumları dərhal dayandırmağa və ixtilafları diplomatik yolla həll etməyə çağırıb.
Kabulov Rusiyanın "Sputnik" agentliyinə verdiyi açıqlamada bildirib: "Biz qarşılıqlı hücumların ən qısa zamanda dayandırılmasını və diplomatik həllin tapılmasını dəstəkləyirik". O əlavə edib ki, əgər Pakistan və Əfqanıstan tərəfləri müraciət edərsə, Rusiya vasitəçilik xidmətləri göstərmək məsələsini nəzərdən keçirəcək.