BAKI, AzerVoice, Nailə Babazadə

ABŞ Prezidenti Donald Tramp, Həmasın Qəzzada bəzi dəstələrə qarşı həyata keçirdiyini iddia etdiyi hücumlarla bağlı sualları cavablandırıb.

AzerVoice xəbər verir ki, Ağ Evdə dərman qiymətləri ilə bağlı keçirdiyi mətbuat konfransında çıxış edən Tramp, həm Rusiya–Ukrayna, həm də Qəzza məsələləri barədə fikirlərini bölüşüb.

Trampa, əvvəllər bu dəstələrin hədəfə alınmasına qarşı çıxmadığı, sonradan isə əks mövqe tutduğu xatırladılıb.

“Orada baş verənləri izləyirəm, nələrin olacağını görəcəyik. Vəziyyət bir qədər sakitləşib. Bu, çox çətin bir bölgədir. HƏMAS-ın öhdəliklərini bilirik və onların bunlara əməl edəcəyini güman edirəm. Ümid edirəm elə də olar.” - deyə Tramp qeyd edib.

Tramp Qəzzadaki vəziyyətin “çox çətin” olduğunu bildirib.

“Bu gün bəzi cəsədləri geri gətirdilər, amma eyni zamanda, lazımi şəkildə davranacaqlarını da dedilər. Əgər elə etsələr, problem yoxdur; etməsələr, biz həll edəcəyik.” - deyə Tramp əlavə edib.

Məlumatlara görə, İsrail ordusu Qəzzada HƏMAS-a qarşı dəstək verdiyi dəstələri qorumaq məqsədilə, atəşkəs sazişinə baxmayaraq, hava hücumu həyata keçirib və iki fələstinlini öldürüb.