BAKI, AzerVoice, Nailə Babazadə
2025-ci il Nobel Tibb Mükafatı “periferik immun tolerantlığı” sahəsindəki əhəmiyyətli kəşflərə görə Mary Brunkow, Fred Ramsdell və Shimon Sakaguchi-yə təqdim olunub. Bu kəşflər immun sisteminin orqanizmin öz toxumalarına qarşı hücum etməsinin qarşısını alan əsas mexanizmləri işıqlandırır və autoimmun xəstəliklərin səbəblərinin anlaşılması və müalicəsinin inkişafında mühüm rol oynayır.
AzerVoice xəbər verir ki, mükafat İsveçin Stokholm şəhərində yerləşən Karolinska İnstitutunda keçirilən tədbirdə açıqlanıb və elmi ictimaiyyət tərəfindən böyük maraqla qarşılanıb. 2024-cü ildə isə Nobel Tibb Mükafatı mikroRNA kəşfi ilə əlaqədar amerikalı alimlər Victor Ambros və Gary Ruvkun’a verilmişdi.
Bu ilki Nobel mükafatları proqramı çərşənbə axşamı fizika, çərşənbə günü kimya, cümə axşamı isə ədəbiyyat sahəsindəki qaliblərin elan olunması ilə davam edəcək. Nobel Sülh Mükafatı cümə günü, İqtisadiyyat üzrə Xatirə Mükafatı isə 13 oktyabr tarixində sahibini tapacaq.
Mükafatların təqdimat mərasimi isə Nobel mükafatlarının banisi Alfred Nobelin ölüm ildönümü olan 10 dekabrda keçiriləcək.