Bakı, AzerVoice

Namibiya hökuməti fil, zebra və begemot da daxil olmaqla 700-dən çox vəhşi heyvanın ovlanacağını açıqlayıb. Kəsilən heyvanların qida çatışmazlığı yaşayan insanlara paylanacağı bildirilib.

AzerVoice xəbər verir ki, Namibiya Ətraf Mühit, Meşəçilik və Turizm Nazirliyindən verilən açıqlamaya görə, bu proqrama 83 fil, 30 begemot, 60 camış, 50 impala, 100 mavi antilop və 300 zebra daxildir. Heyvanlar artan populyasiyayanın müşahidə olunduğu milli parklardan və sürülərdən seçilərək peşəkar ovçular tərəfindən ovlanacaq.

Edilən açıqlamada proqramın məqsədinin Afrikanın cənub-qərbində müşahidə olunan quraqlığın təsirlərini azaltmaq olduğu bildirilib. Həmçinin o da deyilib ki, proqram sayəsində heyvanların sayına həmçinin su ehtiyyatlarına nəzarət etmək asanlaşacaq.

Bu proqram həm də fillər və insanlar arasında potensial münaqişələri azaltmaq məqsədi daşıyır. Belə ki, quraqlıq dövründə qida və su axtaran fillər insanların yaşadığı ərazilərə hücum edə bilər.

Nazirlik daha öncə də 150-dən çox heyvanın kəsildiyini, əldə edilən 56 tondan çox ətin aclıqdan əziyyət çəkən insanlara paylandığını bildirib.

Qeyd edək ki, quraqlıq səbəbindən Namibiyada may ayından etibarən fövqəladə vəziyyət elan edilib. Ölkə əhalisinin təxminən yarısının ciddi ərzaq təhlükəsizliyi ilə üzləşəcəyi gözlənilir.