Bakı, AzerVoice

Son illərdə şəkərli içkilərin istehlakında müşahidə edilən kütləvi artıma paralel olaraq uşaq piylənmə hallarında da nəzərəçarpacaq yüksəlmə görülür.

AzerVoice xəbər verir ki, son 30 ili və 185 ölkəni əhatə edən yeni tədqiqata görə dünya üzrə şəkərli içkidən istifadə kəskin şəkildə artmışdır.

Şəkərli içkilərin fəsadlarından olan uşaq piylənməsində də kütləvi şəkildə artım qeydə alınıb. Statistik məlumatlara əsaslanan mütəxəssislər yüksək artım dərəcəsinin Latın Amerikası, Mərkəzi Asiya və Şimali Afrikada olduğunu bildirirlər.

"The BMJ"-də dərc olunan məqalədə ABŞ, Yunanistan, Kanada və Meksikada aparılmış tədqiqatdan bəhs edilib. Araşdırmaya görə uşaqlar arasında şəkərli içki istehlakı 1990-cı ildən 2018-ci ilə qədərki müddət ərzində 22,9 faiz artım göstərərək həftədə orta hesabla 3,6 porsiyaya yüksəlib.

Böyüklərlə müqayisə etdiyimizdə də uşaqların şəkərli içki istehlakında yüksək artımın olduğu görülür.

Şəkərli içki istifadəsi ilə birlikdə artan piylənmənin hal-hazırda 160 milyona yaxın uşaq və gəncə təsir etdiyi bilinir.

Tədqiqatın baş müəllifi və ABŞ-ın Tafts Universitetinin Qida Tibb İnstitutunun direktoru Dariush Mozaffarian, "Əldə etdiyimiz məlumatlar dünyanın demək olar ki, hər bir ölkəsində həyəcan təbili çalınacaq səviyyədədir" deyə qeyd edib.

Bundan öncəki tədqiqatlar nəticəsində bu növ içkilərin ürək xəstəliklərinə, diabetə və bəzi xərçəng xəstəliklərinə səbəb ola biləcəyi ortaya çıxmışdı. Avropa Pediatriya Akademiyasının prezidenti Berthold Koletzko verdiyi açıqlamada şəkərli içkilərin sadəcə uşaqlıq dönəmində deyil uşaqların gələcək həyatı üçün də problem yarada biləcəyini bildirir.

Tədqiqatçılar şəkərli içkilərin artması səbəblərindən bəhs edərkən şirkətlərin gəncləri hədəf alan reklam siyasətləri, ölkələrin iqtisadi durumu, şəkərli içkilərin istehlakının azaldılmasına dair layihələrin azlığı kimi amilləri qeyd ediblər.