BAKI,VOA,Yusif Şərifzadə

ABŞ Federal Rabitə Komissiyası (FCC) yerli televiziya yayımçılarının ölkədəki televiziya təsərrüfatlarının 39 faizindən çoxuna sahib olmasını qadağan edən qaydanı ləğv edib.

VOA xəbər verir ki, FCC qərarı 2 səsə qarşı 1 səslə qəbul edərək əvvəlki limiti aradan qaldırıb və bundan sonra bu cür müraciətlərin fərdi qaydada qiymətləndiriləcəyini bildirib.

Komissiyanın yeganə demokrat üzvü Anna Qomes qərarın qanunsuz olduğunu bəyan edib. Onun fikrincə, belə bir məhdudiyyəti yalnız ABŞ Konqresi dəyişdirə bilər.

Tənqidçilər isə xəbərdarlıq edirlər ki, yeni qərar yerli televiziya bazarında media şirkətlərinin həddindən artıq güclənməsinə və bazarın daha da mərkəzləşməsinə səbəb ola bilər.

FCC sədri Brendan Karr bildirib ki, qərarın məqsədi yerli televiziya yayımçılarının rəqəmsal media ilə rəqabət şəraitində fəaliyyətini davam etdirməsinə kömək etməkdir. O qeyd edib ki, yerli qəzetlərin sürətlə azalması fonunda köhnəlmiş məhdudiyyətlərin saxlanılması məqsədəuyğun deyil.

Komissiya xatırladıb ki, yerli televiziya stansiyalarının sahibliyinə dair məhdudiyyətlər ilk dəfə 1941-ci ildə tətbiq olunub, sonuncu dəfə isə 2004-cü ildə limit 39 faizə qaldırılmışdı.

Qərar bu ilin martında Tegna şirkətinin 3,54 milyard dollar dəyərində Nexstar tərəfindən alınmasına verilən icazədən sonra qəbul edilib. Həmin sövdələşmə nəticəsində Nexstar-ın ABŞ-dakı televiziya təsərrüfatlarının təxminən 80 faizini əhatə edən şəbəkəyə sahib olacağı gözlənilir.