BAKI,VOA,Yusif Şərifzadə

Banqladeşin cənub-şərq bölgələrində bir neçə gündür yağan güclü musson yağışlarının yaratdığı daşqın və torpaq sürüşmələri nəticəsində azı 44 nəfər həlak olub. Təbii fəlakət səbəbindən bir milyondan çox insan çətin vəziyyətdə qalıb, aidiyyəti qurumlar zərərçəkənlərə yardım çatdırmaq üçün genişmiqyaslı əməliyyatlar həyata keçirirlər.

VOA xəbər verir ki, Banqladeşin Fövqəladə Halların İdarə Olunması Nazirliyinin məlumatına əsasən, Çattoqram, Koks-Bazar, Bandarban, Ranqamati, Xaqraçhari, Moulvibazar və Habiqanc rayonlarında daşqınlar gündəlik həyatı iflic edib. Təbii fəlakət nəticəsində 267 mindən çox ailə evlərində köməksiz vəziyyətdə qalıb və minlərlə yaşayış məntəqəsi xarici aləmlə əlaqəsini itirib.

Daşqın suları minlərlə yaşayış evini su altında qoyduğu üçün sakinlərin bir qismi günlərdir yemək hazırlaya bilmir. Evlərə dolan palçıq mətbəxləri və yaşayış otaqlarını yararsız vəziyyətə salıb, elektrik enerjisinin verilməsində də ciddi fasilələr yaranıb.

Çattoqram sakini Nurul İslam bildirib ki, evlərinin içərisində hələ də su var və yemək bişirmək mümkün deyil. Onun sözlərinə görə, ailənin quru ərzaq ehtiyatı tükənib və elektrik olmadığı üçün gecələri uşaqları ilə birlikdə qaranlıqda keçirməli olurlar.

Rəsmilər bildirirlər ki, minlərlə ailə hazırda yalnız bişirilməsinə ehtiyac olmayan quru ərzaqlarla təmin olunur. Bununla yanaşı, yuyulub dağılmış yollar və zədələnmiş körpülər yardım qruplarının ən çox zərər çəkmiş yaşayış məntəqələrinə çatmasını çətinləşdirir.