BAKI,VOA,Yusif Şərifzadə

Rusiyanın Ukraynanın müxtəlif bölgələrinə endirdiyi zərbələr nəticəsində azı altı nəfər həlak olub, onlarla insan yaralanıb.

VOA xəbər verir ki, Ukrayna rəsmilərinin məlumatına əsasən, cümə günü Rusiyanın pilotsuz uçuş aparatları, artilleriya və aviasiya vasitəsilə həyata keçirdiyi hücumlar ölkənin üç bölgəsində insan tələfatına səbəb olub.

Dnepropetrovsk vilayətində 50-dən çox zərbə endirilib. Hücumlar nəticəsində üç nəfər həyatını itirib. Ölənlərdən ikisi Dnepr çayının qarşı sahilində, Rusiyanın nəzarətində olan Zaporojye Atom Elektrik Stansiyasının yaxınlığındakı Nikopol şəhərində həlak olub.

Zaporojye şəhərinə endirilən zərbə nəticəsində daha iki nəfər ölüb, 17 nəfər isə yaralanıb. Bu barədə vilayət rəhbəri İvan Fedorov məlumat verib.

Sumı şəhərində isə Rusiyanın idarəolunan aviasiya bombaları ilə həyata keçirdiyi hücum nəticəsində bir nəfər ölüb. Vilayət rəhbəri Oleq Hrihorov bildirib ki, Rusiya qüvvələri bölgədə təhlükəsizlik zolağı yaratmağa çalışır.

Bundan əvvəl prokurorluq Sumı vilayətinin şimalında yaşayış evinə pilotsuz uçuş aparatı ilə gecə saatlarında edilən hücum nəticəsində dörd nəfərin öldüyünü açıqlamışdı.

Bu məlumatlar müstəqil mənbələr tərəfindən təsdiqlənməyib.

Bu arada, Kiyevdə bir gün əvvəl paytaxta endirilən və azı 30 nəfərin ölümü ilə nəticələnən raket və pilotsuz uçuş aparatı hücumunun qurbanlarının xatirəsinə matəm günü elan olunub.